56,058 total views
Binigyang-diin ni Cebu Archbishop Alberto Uy sa pagdiriwang ng kapistahan ni St. John Paul II na ang paanyaya ng Panginoon ay maging handa sa lahat ng pagkakataon.
Sa kanyang homiliya, hinimok ng arsobispo ang mga mananampalataya na tularan ang pagiging tapat na lingkod ng Diyos ni St. John Paul II, isang santo na ginamit ang kanyang talino, tapang, at pananampalataya upang ipagtanggol ang buhay, ibahagi ang pananampalataya, at maglingkod nang may pagmamahal sa kabila ng pagdurusa.
“God doesn’t expect perfection. He expects faithfulness. When He returns, may He find us busy doing good, not asleep in comfort, not hiding our gifts, but using them in service and love,” ayon kay Archbishop Uy.
Ipinaliwanag ng arsobispo na ang bawat biyayang ipinagkaloob ng Diyos tulad ng buhay, talento, at pananampalataya, ay may kaakibat na tungkulin.
Aniya, tulad ni St. John Paul II, dapat gamitin ng tao ang mga kaloob na ito para sa kapwa at sa simbahan.
Bilang Santo Papa, binigyang-diin ni John Paul II ang kahalagahan ng buhay sa kanyang ensiklikal na Evangelium Vitae o “The Gospel of Life.”
Paalala ni Archbishop Uy: “The first mark of a good steward: to protect life. If we value life, our own and others’, we are already living the Gospel.”
Dagdag pa ng arsobispo, si St. John Paul II ay nagbigay inspirasyon din sa kabataan sa pamamagitan ng World Youth Day at sa kanyang panawagang “Do not be afraid! Open wide the doors to Christ!” Pinangunahan din ng santo ang New Evangelization na isang panibagong pamamaraan ng pagbabahagi ng pananampalataya nang may kagalakan at pagkamalikhain.
“He also started the New Evangelization. A way of sharing our faith not with fear, but with joy and creativity. The Church must preach the same Gospel, but in a new way, with new energy, new methods, and new hearts,” dagdag ni Archbishop Uy.
Bilang hamon, hinikayat ng arsobispo ang bawat mananampalataya na magsimula sa sariling pamilya at komunidad sa pagpapalaganap ng Ebanghelyo upang makamit ang isang tapat, mapayapa, at nagkakaisang lipunan.
“If we want a better Church, a better family, a better world, it starts today. It starts with you and me, being faithful stewards of what God has entrusted to us,” pagtatapos ni Archbishop Uy.
