48,105 total reads
Nanindigan si dating Bayan Muna Party-list Representative at POWER Convenor Teddy Casiño na hindi dapat ipasa sa mga konsyumer ang gastos mula sa non-technical systems loss sa kuryente.
Sa panayam sa programang Veritas Pilipinas, ipinaliwanag ni Casiño na ang systems loss ay tumutukoy sa kuryenteng nawawala habang ipinapadala ito mula sa planta hanggang sa mga tahanan na nahahati sa technical loss, na dulot ng mismong operasyon ng electrical system, at non-technical loss, na maaaring sanhi ng pagnanakaw ng kuryente, sirang metro o illegal connections.
Para kay Casiño, dapat balikatin ng mga distributor ang non-technical losses dahil bahagi ito ng kanilang responsibilidad na bantayan ang kuryenteng kanilang ibinebenta.
“Matagal na nating sinasabi na at the minimum, ‘yung non-technical systems loss o ‘yung non-technical, dapat ‘yan sagot na ng mga distributors ‘yan. Kasi pananagutan nila ‘yan kung hindi nila nababantayan ‘yung, right, ‘yung pagnanakaw ng kanilang produkto na ibinebenta.” Bahagi ng pahayag ni Casiño sa Radyo Veritas.
Nanawagan din si Casiño ng masusing pagsusuri sa paraan ng pagkukuwenta ng systems loss upang matiyak na tama at lehitimo ang mga ipinapasa sa consumers.
“Kailangan nating busisiin ’yan, kasi baka naman may mga bagay na nilalagay nila as systems loss pero hindi naman talaga dapat kategorya ng systems loss ito.” Dagdag pa ni Casiño.
Ayon kay Casiño, kung patuloy na sasagutin ng consumers ang losses, maaaring mawalan ng insentibo ang mga power company na pagbutihin ang kanilang operasyon at maiwasan ang inefficiencies.
“Kung sasagutin lang palagi ’yan ng consumers, eh magiging parang incentive pa man na maging inefficient ang mga power companies.” Ayon pa kay Casiño
Iginiit din ni Casiño na mahalagang balikan ang polisiya sa systems loss upang matiyak na makatarungan ang singil sa kuryente at hindi basta-basta naipapasa sa mga konsyumer ang pananagutan ng mga power distributor.
Sa pananaw ng Simbahan, ang usapin ng patas na singil at pananagutan sa paggamit ng pangunahing serbisyo ay nakaugnay sa kabutihang panlahat at dignidad ng bawat pamilya, lalo na ng mga mahihirap na higit na naaapektuhan ng mataas na gastusin.
