38,353 total views
Ipinaalala ni Taytay Palawan Bishop Broderick Pabillo ang kahalagahan ng pagtulong sa mga pinakamahihirap.
Ito ang paanyaya ni Bishop Pabillo sa paggunita ng simbahan ng World Day of the Poor sa November 16.
Ayon sa Obispo, ang pagtulong sa mga mahihirap ay kawangis ng pagtanggap sa Panginoong Hesukristo sa puso at tahanan ng bawat mananampalataya upang maging habag at daluyan ng pagmamahal ng Diyos.
“Alam niyo po ang November, yan din ang katapusan ng liturgical year, yan po yung Christ the King natin at matatanggap po natin si Hesus bilang Hari natin kung tinatanggap po natin ang mga papuri po niya, at yan po yung mga mahihirap kaya the Sunday before Christ the King is World Day of the Poor, Kaya po sa November 16, yan po ang World Day of Poor pinapaalala po satin na ang pagtanggap po natin sa mga mahihirap-si Hesus ang tinatanggap natin, na huwag natin silang pabayaan sa ating buhay,” ayon sa panayam ng Radyo Veritas kay Bishop Pabillo.
Hinimok ng Obispo ang mga Pilipino na patuloy na pagsusulong ng mga programa o inisyatibong nakatuon sa pagpapabuti ng kanilang buhay upang makaahon sa kinalugmukang kahirapan.
“Yan din po yung paksa ng liham nang ating Santo Papa na pagpahalagahan ang mga mahihirap sa ating buhay, sila po ay ginagamit ng Diyos upang mapalaala sa atin ang kaniyang prisensya dito sa mundo, kaya kapag tinatanggap at totoong tumutulong tayo sa mga mahihirap, kay Hesus po tayo tumatanggap at siya rin ang ating pinaglilingkuran,” ayon sa panayam ng Radyo Veritas kay Bishop Pabillo.
Itinalaga ngayong 2025 ang pagdiriwang ng ika-siyam na World Day of the Poor sa temang ‘You Are My Hope’ na paalala na hindi lamang charity ang simbolo ng mga mahihirap, sila ay tanda ng pagbangon mula sa kinalugmukang sitwasyon at katatagan laban sa anumang hamon.
