4,488 total reads
Isinusulong ni Department of Labor and Employment (DOLE) Secretary Francis Tolentino ang higit na modernisasyon sa National Labor Relations Commission (NLRC) upang mapabilis at maisaayos ang paghahatid ng katarungan para sa mga manggagawa.
Sa kanyang pagbisita sa tanggapan ng NLRC, nakipagpulong si Tolentino kay NLRC Chair Grace Maniquiz-Tan at iba pang opisyal upang talakayin ang mga hakbang na magpapalakas sa kasalukuyang sistema ng komisyon.
Giit ng kalihim, hindi niya layuning baguhin ang maayos nang operasyon ng NLRC kundi magdagdag lamang ng mga pagbabago upang higit pang mapabuti ang serbisyo nito.
“”[I am] not overhauling the existing functioning, well-oiled system, but adding some 2%, 3% of innovation, which is part of my DNA… without disrupting what you are doing,” ayon sa mensahe ni Tolentino na pinadala ng DOLE sa Radyo Veritas.
Kabilang sa mga plano ng kalihim ang pagtatatag ng National Academy for Labor Justice na magsisilbing sentro ng pagsasanay para sa mga labor arbiter, commissioner, at mga abogado ng DOLE upang higit pang mapaunlad ang kanilang kakayahan sa pagresolba ng mga kaso sa paggawa.
Suportado rin ni Tolentino ang plano ng NLRC na magbukas ng mga satellite office sa mga lokal na pamahalaan, partikular sa mga lugar na may mataas na bilang ng labor cases tulad ng National Capital Region, Central Luzon, at CALABARZON Region.
Binigyang-diin pa ng kalihim ang pagpapalawak ng Government Internship Program (GIP) ng DOLE sa pamamagitan ng pakikipagtulungan sa mga unibersidad upang maitalaga ng mga law at information technology students bilang mga paralegal at IT personnel na tutulong sa operasyon ng NLRC.
Ayon kay Tolentino, mahalagang magkaisa ang lahat ng sektor upang matiyak na mabilis, naayon , at maaasahan ang sistemang naghahatid ng katarungan sa mga manggagawang Pilipino.
“We hope we can move as one, in single cadence, in making sure that what you are doing is what the Filipinos should expect and secure,” bahagi pa ng mensahe ni Tolentino na pinadala ng DOLE sa Radyo Veritas.
Kaugnay nito, kahanay ang adbokasiya ni Tolentino sa Laborem Exercens na ensiklikal ni Saint John Paul II at Rerum Novarum na ensiklikal naman ni Pope Leo XIII na pinaigtingn na pagkilala at pagpapahalaga ng Simbahang Katolika sa pagtataguyod ng katarungan sa paggawa at ang pagtiyak na napapangalagaan ang dignidad at karapatan ng bawat manggagawa.
