95,189 total views
Mga Kapanalig, simula ngayong buwan, ititigil na raw ng social media app na Facebook ang kanilang third-party fact-checking program sa Amerika. Ito ang inanunsyo ni Mark Zuckerberg, founder ng Facebook at CEO ng Meta Platforms. Dámay din sa pagbabagong ito ang Instagram at Threads, mga social media apps na hawak din ng Meta.
Nagsimula noong 2016 ang paggamit ng Meta ng mga sertipikadong fact-checkers, na tumutulong sa mga netizens na alamin kung totoo o hindi ang impormasyong kanilang nababasa. Partikular na binanggit ng Meta ang mga viral hoax, o mga fake news na mabilis kumalat, katulad ng napag-usapan natin noong nakaraang linggo na fake news tungkol sa panibagong outbreak ng sakit. Sa fact-checking program ng Meta, ang mga nag-share at nagnanais pang mag-share ng mga posts gaya nito ay makakukuha ng notification na naglalaman ng mga link na pinabubulaanan ito. Binabawasan din ng Meta ang visibility ng mga post na itina-tag ng mga fact-checkers na fake news. Sa mga Facebook pages din na may kasaysayan ng pag-post ng fake news, may notification na lumalabas upang bigyang-babala ang mga nais mag-follow sa mga ito.
Walang kapangyarihan ang mga fact-checkers na magtanggal ng mga posts, kahit pa fake news ang mga ito. Pero nagpasya ang Meta na itigil ang programa dahil masyado na raw nagiging politically-biased ang mga fact-checkers, at naging pamamaraan na daw ito ng censorship. Hindi naman daw mawawala ang fact-checking. Papalitan ito ng community notes program katulad ng ginagawa sa social media app na Twitter o X, kung saan kahit sino ay pwedeng mag-sign-up bilang fact-checker. Hindi nila kailangang maging sertipikado. Hindi na rin daw bababaan ang visibility ng mga posts na may fake news at hindi na lalabas bilang notification ang mga babala tungkol sa fake news. Ibig sabihin, mas mahirap nang makita na fake news ang isang post kung hindi naman susuriin ang laman nito.
Bagamat sa Amerika pa lamang tinanggal ng Meta ang fact-checking program at wala pang anunsyong gagawin din ito sa ibang bansa, nakababahala pa rin ito para sa lahat ng gumagamit ng social media apps. Sa Pilipinas, itinuturing ang social media bilang pangunahing pinagkukunan ng balita. Pero ano na lang ang mangyayari kung bibitawan ng mismong mga nagmamay-ari at nagpapatakbo ng social media apps ang responsabilidad na tiyaking hindi kakalat ang fake news sa mga apps nila? Ngayong dumarami rin ang kumakalat na artificial intelligence o AI-generated content, kabilang ang mga audio recording at video na mahirap i-verify, hindi ito ang panahon upang iwan na lamang sa mga gumagamit ng social media ang responsabilidad ng fact-checking.
Mga Kapanalig, “huwag [t]ayong makibahagi sa mga gawain… na walang ibinubungang mabuti,” gaya ng sabi sa Efeso 5:11. Tayo man ay taga-share, like, o comment lamang; tagagawa ng post; o tagapamahala ng social media app; bawat isa sa atin ay may responsabilidad sa pagtigil sa pagkalat ng fake news. Sabi nga ni Pope Francis sa isang mensahe niya noong 2018 World Communications Day, walang exempted sa atin sa paglaban sa fake news. Pero nasa mga tagapamahala ng mga kompanyang kumikita sa mga social media apps ang pangunahing responsabilidad na siguruhing hindi magiging pugad ng fake news ang kanilang mga apps. May mga patakaran dapat sila para labanan ito.
Sumainyo ang katotohanan.
