24,051 total reads
Ini-uugnay ni Fr. Ricardo Valencia, Priest Minister ng Archdiocese of Manila Ministry on Integral Ecology, ang kahirapan at pagkasira ng kalikasan sa kasakiman sa paggamit at pagkamkam ng likas na yaman na lubhang nakapipinsala sa kapwa at sa kapaligiran.
Ayon kay Fr.Valencia, maaaring mapakinabangan ng lahat ang ekonomiya kung walang labis na pagkamakasarili sa pagpapayaman at pagkuha ng yamang hindi naman para sa isang indibidwal o grupo.
Iginiit ni Father Valencia na hindi maaaring paghiwalayin ang usapin ng ekonomiya, kahirapan at pangangalaga sa kalikasan, dahil ang hindi makatarungang paggamit at pamamahagi ng likas yaman ay maaaring magpalala kahirapan at environmental degradation.
“Well, ang ekonomiya ay ma-enjoy sana ng lahat kung wala ang kasalanan. At ang kasalanan ay pagiging ganid. Hindi masisira ang kalikasan ‘pag walang mga ganid. Walang naghihirap ‘pag walang sobrang nagpapapayaman o kumukuha ng hindi para sa kanila. So, ganid ang problema ng lahat, pati ng kalikasan at ng mga mahihirap.” ayon sa panayam ng Radyo Veritas kay Fr.Valencia.
Nanawagan ang Ministry on Integral Ecology para sa higit na panalangin at kamalayan ng mga Katoliko sa pangangalaga sa kalikasan, kasabay ng paggunita sa World Day of Prayer for the Care of Creation tuwing Setyembre.
Inihayag naman Brother Adrian Tambuyat, Ministry Coordinator ng Archdiocese of Manila Ministry on Integral Ecology na mahalagang makita ng mga Kristiyano ang simbolo ng Simbahan, gaya ng pagtunog ng kampana, hindi lamang bilang babala sa panahon ng panganib kundi bilang paanyaya rin sa panalangin.
Kaugnay nito, sinabi ni Tambuyat na bahagi ng panawagan ng Simbahan ang paglalaan ng panalangin para sa pangangalaga sa sangnilikha, lalo na sa harap ng mga suliraning pangkapaligiran na nakaaapekto rin sa buhay at kabuhayan ng mga komunidad.
Sa ika-6 ng Setyembre 2026, itinakda sa Pilipinas ang Misa para sa Pangangalaga sa sangnilikha na bahagi ng mga gawain sa Season of Creation ng Archdiocese of Manila Ministry on Integral Ecology.
