29,397 total views
Ipinagkatiwala ni Ozamiz Archbishop Martin Jumoad sa Panginoon ang kanyang bagong misyong gagampanan bilang tagapangasiwa ng Diocese of Pagadian.
Ito ang mensahe ng arsobispo makaraang italaga ng Santo Papa Francisco bilang apostolic administrator ng Pagadian kasunod ng pagpanaw ni Bishop Ronald Lunas.
Batid ni Archbishop Jumoad ang kaakibat na hamon sa pansamantalang pangangalaga sa kawan ng Pagadian subalit sa tulong at gabay ng Panginoon ito ay kanyang mapagtatagumpayan.
“Kahit ito ay krus na idinadagdag sa aking krus dito sa Archdiocese of Ozamiz but I have to trust the Lord that the Lord will always abide us, will always remain in us , will always guide us. Have faith, and trust and be always faithful to whatever He will do for His greater glory and to His people.” pahayag ni Archbishop Jumoad sa Radio Veritas.
Isa ang Pagadian sa mga suffragan dioceses ng Ozamiz kasama ang Iligan, Dipolog at Marawi.
Kasunod ng pagpanaw ni Bishop Lunas, nasa siyam na mga diyosesis na sa bansa ang sede vacante kabilang na ang Alaminos, Baguio, Balanga, Catarman, Gumaca, Ipil, San Pablo at Tarlac.
Apela ni Archbishop Jumoad sa mananampalataya ang mga panalangin upang pagkalooban ng Panginoon ng pinunong pastol ang siyam na mga bakanteng diyosesis.
“We have to pray and ask the Lord for guidance at makapagbigay then ang Santo Papa makapili talaga ng pari na ilagay sa mga bakanteng dioceses.” ani ng arsobispo.
Tinuran ni Archbishop Jumoad na lahat ng pari ay makasalanan at hindi karapat-dapat sa pagiging obispo ngunit sa gabay ng Diyos at puspos ng Espiritu Santo ay makapipili ng mga mabuting pastol na mangangalaga sa kawan ng siyam na diyosesis.
Bukod sa mga sede vacante na diyosesis ilan pang obispo ang naabot na ang mandatory retirement age na 75 taong gulang kabilang na si Archbishop Rolando Tria Tirona ng Caceres (77); Virac Bishop Manolo Delos Santos (76); Cubao Bishop Honesto Ongtioco (75) at; Cabanatuan Bishop Sofronio Bancud (75).
