898 total reads
Pabor ang CBCP – Episcopal Commission on the Laity na patungan ng mas mataas na buwis ang mga alak at sigarilyo dahil hindi na ito nakabubuti sa mga kabataang nalulong rito.
Sang – ayon si Manila Auxiliary Bishop Broderick Pabillo, chairman ng kumisyon sa suwestiyon ng ilang eksperto na taasan ang “sin tax” sa alak at sigarilyo lalo’t napupunta naman ang naturang buwis sa health projects ng pamahalaan.
Paliwanag pa ni Bishop Pabillo kung matutuloy ang nasabing suwestiyon maiiwasan na ang paglobo ng bilang ng mga kabataang tumatangkilik nito.
“Okay lang yun kasi bisyo naman yan dapat taasan yung tax para una makaiwas ang tao sa bisyo at pangalawa mapapakinabangan pa lalo na nabibigyan ng gamot yung mga galing sa sin tax. Kaya kung tataasan yung presyo niyan yung mga consumer niyan ay mababawasan para maiwasan ng mga kabataan ang pagbibisyo,” bahagi ng pahayag ni Bishop Pabillo sa panayam ng Veritas Patrol.
Lumabas sa pag – aaral noong 2013 ng Young Adult Fertility and Sexuality (YAFS) na halos pito sa bawat sampung Pinoy edad kinse hanggang bente – kuwatro ang nakatikim na ng alak.
Samantala, sa tala naman ng Department of Health na ang alcohol ay nakakapag – bigay ng 200 uri ng mga sakit at injury na sanhi ng pagkamatay ng higit 3 milyon sa buong mundo kada taon.
Habang higit 1 libo rin ang naa – aksidente dito sa Pilipinas dahil sa alak.
Nauna ng ipinaalala ni Apostol San Pablo na ang katawan ng tao ay siyang tahanan ng Espiritu Santo.
