10,833 total reads
Nagpaabot ng pasasalamat ang Ateneo de Zamboanga University (AdZU) sa mga paaralan, institusyon, organisasyon, komunidad, at indibidwal na patuloy na nagpapaabot ng panalangin, mensahe, at suporta sa unibersidad matapos ang insidente ng pamamaril noong Agosto 18, 2026.
Sa mensahe ni AdZU President Rev. Fr. Ernald M. Andal, SJ, sinabi nitong malaking bagay para sa unibersidad ang pakikiisa ng mga taong dumamay sa kanilang panahon ng pagdadalamhati at kawalan ng katiyakan.
“We felt your care. At a time of deep grief and uncertainty, you reminded us that we did not have to carry everything alone,” Bahagi ng pahayag ni Fr. Andal.
Ayon sa Pari, patuloy pa ring nagluluksa ang komunidad at nangangailangan ng panahon upang maunawaan at maproseso ang nangyari.
Binigyang-diin din niya na magkakaiba ang paraan ng bawat isa sa pagharap sa trauma kaya mahalagang maging mapagpasensya, makinig, at manatiling malapit lalo na sa mga higit na nasasaktan.
“This experience has reminded us that a school is more than a place for lessons and degrees. It is a community entrusted with the lives and well-being of young people” Dagdag pa ni Fr. Andal.
Paliwanag ng Pari, dapat maging lugar ang mga paaralan kung saan ang mga kabataan ay nariring, nakikita, napoprotektahan, at nabibigyang halaga ang dignidad bilang isang indibidwal.
Kasabay nito, nanawagan ang AdZU, kasama ng iba pang educational communities, na muling pagtibayin ang pangako na gawing mas ligtas at mapagkalingang lugar ang mga paaralan na malaya sa karahasan, takot, at pananakot.
“This is a responsibility we share, and one that calls for our constant attention and care,” Ani pa ni Fr. Andal.
Muli ring nagpasalamat si Fr. Andal sa lahat ng patuloy na nananalangin, tumutulong, at nakikiisa sa Ateneo de Zamboanga University (AdZU), na mananatili sa kanilang komunidad at nawa ay maipasa rin ang kabutihang kanilang natanggap sa iba.
Matapos ang halos dalawang linggong suspensyon ng klase muling nagbalik ang face-to-face classes sa AdZU noong Setyembre 1, 2026 kung maraming mga security measures at protocols ang ipinatupad ng unibersidad upang matiyak ang kaligtasan ng buong komunidad.
