43,865 total reads
Bubuo ang Catholic Bishops’ Conference of the Philippines – Episcopal Commission on Ecumenical Affairs ng National Coordinating Council of Directors for Ecumenical Affairs bilang bahagi ng pagsusulong ng pagkakaisa sa pagitan ng mga Kristiyanong pamayanan sa bansa.
Sa panayam sa program Barangay Simbayanan, sinabi ni Rev. Fr. Francis Protacio S. Cortez III ng Diocese of Malolos at CBCP Episcopal Commission on Ecumenical Affairs – National Coordinator for Liturgy, na bubuuin ang national coordinating council ng 20 miyembro na itatalaga sa Agosto 24, 2026.
Kabilang dito ang mga coordinator para sa formation, liturgy, at pakikipag-ugnayan sa mga diyosesis at arkidiyosesis na may kani-kanilang tanggapan o komisyon para sa ecumenical affairs.
Ipinaliwanag ni Fr. Cortez na ang hakbang ay ganap na pagsasabuhay sa diwa ng Second Vatican Council at sa panawagan ng Simbahan para sa pagkakaisa ng mga Kristiyano.
“Ito ay pagsasabuhay natin sa Konsilyo Vaticano II na kung saan ay ‘yung aggiornamento na ating tinatawag na kung saan ay talagang ito ‘yung pagbubukas ng pinto at ng mga bintana ng simbahan para nang sa ganoon ay magkaroon ng pagkakaisa ang mga lider Kristiyano at ang pamayanan ng Kristiyano na ating pinaglilingkuran. Ito po ay nakabatay din po sa sabi nga natin ay Ut Unum Sint, na kung saan ay nagsasabing ang lahat ay maging isa.” Bahagi ng pahayag ni Fr. Cortez.
Ibinahagi rin ng Pari na lumawak na ang mga dioceses at archdioceses na nagsusulong ng ecumenism, mula sa humigit-kumulang 10 porsiyento noong nagsisimula ang inisyatiba hanggang 40 porsiyento na sa kasalukuyang panahon.
Ayon kay Fr. Cortez, nakatuon ang ecumenical engagement ng kumisyon ng CBCP sa pakikipag-ugnayan sa mga matatagal ng pamayanang Kristiyano na mayroong malaking kaugnayan sa mula pa nung una sa mga Katoliko kabilang ang Iglesia Filipina Independiente, United Methodist Church at United Church of Christ in the Philippines.
Binigyang-diin ng Pari na hindi layunin ng ecumenism na burahin ang pagkakaiba ng mga denominasyon, kundi kilalanin ang mga nagbubuklod sa mga Kristiyano, lalo na ang pananampalataya sa iisang Diyos.
“Ninanais at hinahangad ng Ecumenical Affairs ng CBCP, upang ang lahat ay pag-isahin, ang lahat ay pagbuklurin bilang iisang sambayanan ng Diyos kahit na mayroong pagkakabaha-bahagi man sa iba’t ibang larangan ng pananali, pananampalataya, o pagkilala sa Diyos, pero pinagbubuklod at pinag-iisa ito ng pag-ibig at pagmamahal ng iisang Diyos na mayroon tayo.” Dagdag pa ni Fr. Cortez.
Pagbabahagi ng Pari, maiuugnay rin ito sa synodality, kung saan hindi lamang mga kleriko kundi maging ang mga layko at iba pang pamayanang Kristiyano ay inaanyayahang makibahagi sa paglalakbay tungo sa pagkakaisa.
“Hindi kalaban ng isa’t isa ang isa’t isa. Kundi, mayroong pinagbubuklod at pinag-iisa ang lahat.” Ayon pa kay Fr. Cortez.
Gaganapin ang Mass at Oathtaking ng National Coordinating Council of Directors for Ecumenical Affairs ng CBCP sa Agosto 24, 2026, ganap na alas-3 ng hapon, sa Blessed Sacrament Chapel ng Manila Cathedral.
