2,220 total reads
Nakikiisa sa panalangin at pakikiramay ang Caritas Philippines sa mga pamilyang naapektuhan ng magnitude 7.4 na lindol na sinalanta ang kanlurang bahagi ng Colombia.
Sa pahayag ng Caritas Philippines, ipinagdarasal nito ang mga Colombia na patuloy na nakararanas ng epekto ng malakas na lindol, upang mabigyan sila ng lakas, kapanatagan, at pag-asa habang nagpapatuloy ang rescue at recovery operations.
Ayon sa mga ulat, malawak ang pinsalang iniwan ng lindol na tumama sa ilang lugar kabilang ang Cali, Pereira, Manizales at iba pang bahagi ng kanlurang Colombia.
Maraming gusali ang gumuho o napinsala, kabilang ang mga tahanan, ospital at iba pang imprastraktura, habang maraming residente ang trapped sa ilalim ng mga guho kung saan idineklara rin ng pamahalaan ng Colombia ang state of emergency upang mapabilis ang pagtugon sa sakuna.
“In this time of uncertainty, Caritas Philippines stand with solidarity and prayer to our brothers and sisters in Colombia who have been affected by 7.4 magnitude earthquake.May our collective prayers bring strength, comfort, and hope to all Colombian families affected,” ayon sa mensahe ng Caritas Philippines.
Sa pinakahuling ulat, umabot na sa mahigit 250 ang nasawi habang nagpapatuloy ang paghahanap sa mga nawawala at posibleng nakaligtas sa ilalim ng mga gumuhong gusali sa Columbia.
Una naring nagpaabot ng pakikiramay ang pamahalaan ng Pilipinas, habang ayon sa Department of Foreign Affairs na wala pang naitatalang Filipino na nasawi o nasugatan sa lindol sa kanilang pangangalap ng impormasyon ngayon.
Samantala, nagpahayag din ng pagdadalamhati si Pope Leo XIV sa nangyaring sakuna, habang patuloy na nananawagan ang Simbahan sa panalangin at pakikiisa para sa mga biktima at pamilyang naiwan ng sakuna.
