7,854 total reads
Inihayag ng Dapat Isa Lang o D1L Movement ang planong pagdaraos ng National Signing Day for People’s Initiative para itulak ang isang “genuine anti-political dynasty law”.
Sa panayam kay Atty. Alex Lacson ng Dapat Isa Lang Movement Petitioner sa Radyo Veritas ay inihayag nito ang plano ng kilusan na pagsasagawa ng National Signing Day for People’s Initiative sa Hunyo 12, 2026 kasabay ng pagdiriwang ng Araw ng Kalayaan.
Ayon kay Atty. Lacson, layunin ng nationwide campaign na makalikom ng mga lagda upang maisulong ang pagpasa ng isang tunay na Anti-Political Dynasty Law sa bansa sa pamamagitan ng People’s Initiative.
Pagbabahagi ni Lacson, kabilang sa pinaghahandaan ng kilusan ang pagtatakda ng mga lugar sa bawat distrito sa bansa kung saan maaring magtungo ang mga mamamayan upang lumagda ng pakikiisa sa pagsusulong ng isang tunay na Anti-Political Dynasty Law.
“Sa June 12 which is the National Independence Day sinet po natin yan as National Signing Day for People Initiative. Let’s make a national campaign na we will identify the areas kung saan pupunta ang mga tao sa distrito nila at doon po pupunta sila at mag-sign. National Signing Day for People Initiative, para makapasa tayo ng genuine na Anti-Dynasty Law, nationwide campaign ang gagawin natin.” Bahagi ng pahayag ni Atty. Lacson sa Radyo Veritas.
Isinusulong ng Dapat Isa Lang o D1L Movement ang pagpapatibay ng isang tunay na batas laban sa political dynasty sa pamamagitan ng People’s Initiative.
Ayon sa kilusan, layunin nitong wakasan ang siklo ng korapsyon at kahirapan na dulot na rin ng dominasyon ng iilang pamilya sa politika.
Iminumungkahi ng panukala na limitahan sa isang posisyon lamang ang maaaring hawakan ng isang pamilya sa bawat antas ng pamahalaan, saklaw ang mga kamag-anak hanggang ika-apat na antas.
Sa ilalim ng People’s Initiative, kinakailangan ang lagda ng 10 porsyento ng rehistradong botante sa buong bansa at 3 porsyento sa bawat distrito upang maisulong ang panukala sa plebisito.
Binigyang-diin ng Dapat Isa Lang o D1L Movement na layunin nitong tiyakin ang pantay na pagkakataon ng bawat mamamayan na makapagsilbi sa pamahalaan.
