201 total views
Nanawagan si Diocese of Dipolog Bishop Severo Caermare sa mga mananampalataya na ipanalangin ang beatipikasyon ni Father Francesco Palliola, isang martir na nag-alay ng kanyang buhay sa Panginoon sa pamamagitan ng pagtulong at paglilingkod sa mga lumad ng Zamboanga Peninsula.
Ayon kay Bishop Caemare, napakamakahulugan ng pagiging martir ni Fr. Palliola dahil ito ang kauna-unahang dayuhang martir sa Pilipinas, at magiging kauna-unahan mula sa Mindanao.
“It would be very significant for us to have one from Mindanao, and not only from Mindanao [because] he also represents the foreign missionaries from Mindanao as a first martyr,” bahagi ng pahayag ni Bishop Caermare.
Dagdag pa ng Obispo, malaki ang maibibigay na inspirasyon ni Father Palliola para sa mga residente ng Mindanao lalo na sa nagaganap na digmaan sa Marawi City.
Paliwanag ni Bishop Caermare, si Fr. Palliola ay naniniwala na malaki ang magagawa ng pakikipagdiyalogo upang makamit ang tunay na kapayapaan dahil ito ang ginawa ng Pari nang mamatay ito dahil sa pananampalatayang Kristiyano.
“Fr. Francesco would be a man of dialogue, he could be a man who pursue peace despite of the violence that has happened, and I think that is also what we [need], to open ourselves to some sense of dialogue and respect to culture to religion, that everyone aspire. We aspire for peace and we ask you also to pray for us for peace in Mindanao,”dagdag ni Bishop Caermare.
Si Fr. Francesco Palliola, SJ ay isang maharlika na isinilang sa Nola, Naples, Italy noong ika- 10 ng Mayo 1612.
Naordinahan itong pari noong ika-6 ng Pebrero 1637 at pumasok sa Kongregasyon ng mga Heswita.
Taong 1643 nang dumating ito sa Pilipinas at naglingkod sa mga Lumad sa Ponot na ngayon ay maskilala bilang Dalman, Zamboanga Del Norte.
Pinatay si Fr. Palliola noong ika-29 ng Enero 1648 dahil sa patuloy nitong paglilingkod at pagtuturo ng pananampalataya sa mga Lumad.
Magmula noon, naging bahagi na ng kultura ng mga Lumad ang magtipon-tipon tuwing ika-29 ng Enero upang ipanalangin si Fr. Palliola at humingi ng gabay mula sa Panginoon sa pamamagitan ng pari.
Samantala, sa ika-14 ng Septyembre ngayong taon inaasahang matatapos ang Diocesan Process ng beatification ni Fr. Palliola at susunod na dito ang Roman phase.
Kakailanganin naman ng isang milagro sa pamamagitan ni Fr. Palliola upang maideklara itong Beato.
