Ito ang nasumpungan ni Father Teresito “Chito” Suganob sa 116 araw na pagiging bihag ng Maute-Isis group nang lusubin ang Marawi City noong ika-23 ng Mayo taong kasalukuyan.
Sinabi ni Father Suganob na ang kanyang naranasan sa loob ng 116-araw na pagkakabihag ay kuwento ng pananampalataya at buhay.
“It is a story of faith. Kuwento talaga ng buhay at pananampalatya sa Panginoon. We face death every day. Dahil sa airstrikes, bomba ng kanyon, bala, tangke de giyera, giyera talaga. Kung makikita sa news hindi ka talaga bubuhayin. For me personally, I prepare myself to met death. Sabi ko lang kung bubuhayin ako sa Kanya na ‘yun. Pero kung hindi bibigyan kami ng pagkakataon na maghanda kung ano na ang mangyayari. And then wala kang ibang magawa at maisip kundi magdasal ito ang buhay ng tao. Nagtatanong man bakit ganito Lord. Pero, pasalamat pa rin sa puso, sa isip, inaasahan na nandiyan pa rin ang Panginoon. Nakikita niya ang lahat,” ayon kay Fr. Suganob.
Si Fr. Suganob ay ang vicar general, chancellor ng Prelatura ng Marawi at chaplain ng Mindanao State University na kabilang sa 13 katao na unang bihag ng mga terorista na dinukot mula sa St. Mary’s cathedral at Dansalan College sa Marawi.
Sa exlusibong panayam ng Radio Veritas sa launching ng Damay Kapanalig Marawi telethon, sinabi ni Father Suganob na sa gitna ng kawalang pag-asa at pagharap sa kamatayan ay tanging ang Panginoon pa rin ang magiging sandigan at siyang magpapasya sa mga pangyayari sa buhay ng tao.
Itinuturing din ng pari na espesyal ang pagtawag sa kanya ng panginoon dahil naranasan niya ang “sorrowful mystery” at naging instrumento ng milagro.
“Tinawag ako ng Panginoon at ginusto ko rin na susunod ako sa mga utos niya. Maging servants ng mga tao lalu na sa mahihirap, sa pangyayaring yun malalim na sabi ko, may ibang tawag ang Panginoon para sa akin. At saka, malalim na pag-ibig ang ipinakita ng Panginoon espesyal ako before kay Lord dahil naranasan ko kung ano ang sorrowful mystery. Pinakamahirap pero nandiyan ang Panginoon. Nagpapasalamat pa rin ako sa Panginoon na kahit na masakit at mahirap pero in a special way, espesyal ang pagtawag sa akin ng Panginoon. Bokasyon ko na maging instrumento ng milagro, hindi ko na inisip na lalabas pa ako ng buhay. Im prepared, binuhay pa niya ako, beyond my imagination para siguro ipaalam na Siya lang ang nakakaalam sa buhay ng tao – kung ano mangyari. Maari kang mamatay o maari kang mabuhay. We do not know. Kailangan lang ay ang pananalig sa Panginoon,” pagbabahagi ni Father Suganob.
Naniniwala ang pari na bilang taga-paglingkod ng Panginoon ay may iba pang dahilan ang Diyos kung bakit nananatili siyang buhay matapos ang karanasan sa digmaan.
Nagpapasalamat naman si Fr. Suganob sa pag-iral ng pagdadamayan at pagkakaisa ng mga bansa, mamamayan at ng mga relihiyon para sa muling pagbangon ng lungsod ng Marawi.
Ang limang buwan na digmaan sa Marawi City ay natapos nang mapatay ang mga lider ng Maute-Isis terrorist na sina Isnilon Hapilon at Omar Maute na kabilang sa higit 900 teroristang napatay sa bakbakan.
Higit naman sa P50-bilyong piso ang kinakailangang pondo para sa rehabilitasyon ng Marawi City dahil sa lawak ng pinsalang dulot ng digmaan.
