34,936 total reads
Hinimok ng dating pangulo ng Catholic Bishops’ Conference of the Philippines (CBCP) ang mga tiwaling indibidwal at opisyal ng pamahalaan na isauli ang mga nakaw na yaman, partikular ang mga may kaugnayan sa ‘flood control controversy’.
Ayon kay Kalookan Bishop Pablo Virgilio Cardinal David-ang kasalukuyang bise presidente ng Federation of Asian Bishops’ Conferences (FABC) mas madali sanang kaharapin ang mga kasalukuyang krisis kung hindi nauubos ang pondo ng pamahalaan dahil sa katiwalian.
Nawa ayon sa opisyal ng simbahan ay matauhan na ang mga sangkot at ibalik sa taungbayan ang pondo na dapat sana ay inilalaan sa kabutihan ng higit na nakakarami.
“At gayon din sana mahimasmasan na ang mga kurakot, mga tiwali sa ating gobyerno na makita nila na tingnan ninyo kung hindi nawaltas itong ating pondong bayan sa katiwalian, mas madali sana nating harapin ang mga krisis, magkaroon ng safety nets,” ayon kay Cardinal David sa panayam ng Radyo Veritas sa programang Pastoral Visit-on-the air.
Dagdag pa ni Cardinal David, “sana parang matauhan yung mga nasa katungkulan. Pwede pang isoli ang hindi inyo. Kasi hanggat nasa sa inyo ang nakaw na yaman, ay hindi kayo magiging maligaya. Iyan po ay sumpa, sumpa po iyan. Mayaman nga kayo pero hindi kayo dadalhin sa kabutihan ng kayamanan na iyan. Kaya iwaksi ang maling yaman, ibalik ang hindi inyo, at makikita ninyo magliliwanag, magliliwanag ang bukang liwayway ng pag-asa sa ating bayan.”
Una na ring hinikayat ni Cardinal David ang mananampalataya sa gaganaping Penitential Walk for Life 2026 ngayong March 20, kung saan magiging katuwan siya sa misang gaganapin sa Manila Cathedral kasama si Manila Archbishop Jose Cardinal Advincula sa alas-7:30 ng gabi.
Sa panayam, sinabi ni Cardinal David na ang layunin ng sama-samang paglalakad ay upang ipinalangin na matapos na ang karahasan sa buong mundo, katiwalian sa pamahalaan, krisis na dinaranas ng mga Overseas Filipino Workers lalo na sa Gitnang Silangan, at ang epekto nito sa ekonomiya.
Sinabi ng pinuno ng simbahan na ito ay hindi lamang limitado sa mga nais na dumalo sa pagtitipon kundi maging sa mga matatanda, may sakit at nasa ibayong dagat.
Ang programa at mga kaganapan ay live na mapapanood at mapakikinggan sa DZRV 846 facebook page, at You Tube Channel gayundin sa himpilan ng Radyo Veritas-simula ikaapat ng hapon hanggang sa ikawalo ng gabi.
Ayon pa kay Cardinal ang Penitential Walk for Life ay isang magandang pagkakataon upang magsama-sama sa panalangin para wakasan ang kaguluhan at ang epekto nito sa ekonomiya lalo na sa Pilipinas.
Ang Penitential Walk for Life 2026 ay pinangungunahan ng Sangguniang Layko ng Pilipinas na may temang “Walk for Life! Walk for Unity as One Nation!” kung saan inaasahang ang pakikibahagi ng mga mananampalalataya sa iba’t ibang diyosesis sa mariing paninindigan para sa pagsusulong ng dignidad at kasagraduhan ng buhay, laban sa anumang banta laban sa buhay ng tao at maging ng kalikasan.
