454 total views
Pinaalalahanan ni Pope Leo XIV ang mga mamamahayag na hindi dapat magamit bilang ‘propaganda’ ang mga balita at impormasyon, lalo na sa panahon ng digmaan.
Sa pakikipagpulong sa mga mamamahayag sa Vatican City, binigyang-diin ng Santo Papa ang kahalagahan ng tapat at may tungkuling pagpapahayag ng mga pangyayari at kaganapan lalo na sa patuloy na digmaan sa Gitnang Silangan.
“Always, but especially in the dramatic circumstances of war such as those we are experiencing, information must guard against the risk of turning into propaganda,” ayon sa pahayag ng Santo Papa sa media sa panayam ng Italian state-owned TV channel Rai 2.
Sinabi pa ni Pope Leo, “to show the suffering that war always brings to populations, to show the face of war, and to tell it through the eyes of the victims so that it does not turn into a video game.”
Ayon sa pinunong pastol, mahalagang maipakita ng media ang tunay na epekto ng digmaan sa mga mamamayan, lalo na ang paghihirap ng mga biktima.
Dagdag pa ng Santo Papa, hindi dapat maging tagapagsalita ng kapangyarihan ang media, sa halip ay bilang tagapaghatid ng katotohanan.
Muling iginiit ni Pope Leo XIV na hindi kayang palitan ng teknolohiya at artificial intelligence ang kritikal na pag-iisip at malayang pananaw ng mga mamamahayag.
“Since the challenge of our time is that of artificial intelligence, I think of the need to regulate communication according to the human paradigm and not the technological one. This means, ultimately, knowing how to distinguish between the means and the ends.” Paliwanag ni Pope Leo XIV.
Hinimok din ng Santo Papa ang media na manatiling bukas sa iba’t ibang pananaw upang mapanatili ang patas at makataong pamamahayag sa gitna ng lumalalang pagkakahati ng opinyon sa lipunan.
