8,781 total views
Ipinaalala ni Manila Archbishop Jose Cardinal Advincula sa mga pamilya na paigtingin ang pagmamahalan at paghariin ang pagpapatawad sa puso.
Ito ang mensahe ni Caridnal Advincula sa fiesta mass ng Holy Family Parish ng Diocese of Novaliches.
Ayon kay Cardinal Advincula, katulad ng kasagraduhan ng Holy Family si Jesus, Maria at Joseph ay patuloy na mamayani ang pagmamahalan ng bawat kabilang sa pamilya.
“Nagpapasalamat tayo sa Panginoon sa pagtipon niya sa atin bilang kaniyang pamilya upang kaniyang busugin ng kaniyang salita at katawan, at dugo, mahalaga ang pamilya, kahit ang Diyos, ng pinili niyang magkatawang tao, pinili niyang maging bahagi ng isang pamilya, pinili niyang manahan sa sinapupunan ng ina, sa siyam na buwan upang maging bahagi ng isang pamilya, umuuwi tayo sa pamilya kapag nasasaktan tayo, nagugutom, naguguluhan sa mga pangyayari sa buhay, tahanan ang ating uwian bilang pamilya,” ayon sa pagninilay ng Arsobispo.
Tiniyak naman ng Diocese of Novaliches ang pagsusulong sa kasagraduhan at kahalagahan ng pamilya bilang pundasyon ng lipunan.
Ayon kay Novaliches Bishop Roberto Gaa, mahalagang mapanatili ang pagkakaisa at pagtutulungan ng pamilya upang malampasan ang anumang pagsubok.
“Paanyaya po ng ating kapistahan ay tayo ay tunay na mabuo at magkaisa sa pamilya, isabuhay ang pagpapahalaga, isabuhay ang ugnayan sa pamilya para tunay nating mapanatili ang pagiging pamilya, siguro unang-unang kilalanin muna si Maria, pati si Hesus paano nga ba sila namuhay dito sa lupa? para alam natin kung sino yung gagayahan natin at tutularan natin at tayo din ay maging halimbawa sa ating kapwa,” ayon sa panayam ng Radio Veritas kay Bishop Gaa.
Nangako din si Fr. Wilmer Samillano Sch. P, na bilang pastol ay titiyakin na mananatiling sagrado ang pamilya sa pamamagitan ng pagdedebosyon sa mga katuruan ng Holy Family.
Inihayag ng Pari na kung magiging masaya at matatag ang pamumuhay ng isang pamilya kung naka-sentro sa panginoon ang kanilang pamumuhay sa gitna ng maraming banta na maaring sumira dito.
