1,239 total views
Tiniyak ni Senate President Pro Tempore Loren Legarda ang pagpapaigting ng mga programang mangangalaga at magpapanatili sa kultura ng mga Pilipino.
Ito ang mensahe ng mambabatas kasabay ng isinagawang pagdinig sa mga panukalang naglalayong paigtingin ang protection at conservation ng Philippine cultural heritage.
Ayon kay Legarda dapat paunlarin ng kasalukuyang henerasyon ang sinimulan ng mga ninuno.
“I believe that culture is the narrative that binds us as a nation, and it is something we owe to our ancestors and heroes who built the Philippines as it is today.” bahagi ng pahayag ni Legarda.
Kabilang sa mga tinalakay ng Committee on Culture and the Arts ang Senate Bill No. 622 na iniakda ni Legarda, Senate Bill No. 117 ni Senator Nancy Binay, Senate Bill No. 1094 ni Senator Ramon Revilla Jr. na pagsamahin ang cultural mapping at cultural heritage education program sa National Cultural Heritage Act (Republic Act No. 10066).
Suportado ni Senator JV Ejercito ang hakbang ni Legarda sapagkat mahalaga ito upang mapalakas ang pagkakilanlan ng mga Pilipino.
“Probably this is one of the things that is lacking in our country…love of history, love of culture and heritage which are very significant in strengthening patriotism and our identity as Filipinos.” ayon kay Ejercito.
Tinalakay din sa pagdinig ang Senate Bill No. 624 na layong magtatag ng institute for living traditions at ang Senate Bill No. 242 para sa pagpatupad ng cultural education sa Philippine educational system.
Sa datos ng pamahalaan sa 110 milyong populasyon sa bansa 15 porsyento rito ay nabibilang sa Indigenous Peoples na isa sa mangungunang makikinabang sa isinusulong na panukalang batas.
