159 total views
Nanawagan si Rev. Fr. Jerome Secillano – Executive Secretary ng CBCP Permanent Committee on Public Affairs sa mga kandidato na gawing huwaran sa pagsisilbi at paglilingkod sa taumbayan si Hesus.
Ayon sa Pari, tulad ni Hesus dapat na taus-pusong ibahagi ng bawat lider ang kanilang sarili para sa taumbayan at lipunan kung saan dapat na maging handa ang mga ito na magsakripisyon ng sarili para sa kabutihan ng mas nakararami.
Paliwanag pa ni Fr. Secillano, dapat na gawin ng bawat lider ang kanilang tungkulin ng walang hinihintay na kapalit kundi ang mapaglingkuran lamang ng tapat ang bawat mamamayan kasabay ang pagpapaunlad sa bayan.
“Dapat din siguro na magkaroon din sila ng pagsasakripisyo, yung pagsasakripisyo na isipin at gawin kung anong makabubuti para sa mas nakararami at hindi lamang yung makabubuti para sa kanilang sarili, para sa kanilang pamilya so they must give out any amount of donation, any amount of selfishness or greed for the sake of the Filipino people, kune si Hesus nga eh nagbigay nga ng kanyang sarili para sa tao eh sana naman itong ating mga nagnanais na maging pinuno ibigay din nila ang kanilang mga sarili para sa taumbayan, para sa ating bansa..” pahayag ni Father Secillano sa Radio Veritas.
Naunang hinimok ng Pari ang mga kandidato na gamitin ang pagkakataon ngayong Kwaresma upang suriin ang kanilang konsensya at tunay na intensyon sa pagnanais na maglingkod sa bayan.
Bahagi ng panlipunang turo ng Simbahan ukol sa politika ang seryoso at kawalan ng sariling interes ng bawat kandidato sa posisyon at kapangyarihan upang tunay na mapaglingkuran ang taumbayan ng tapat at dalisay.
Matatandaang sa naganap na Apostolic Visit ng Kanyang Kabanalan Francisco, Enero noong nakalipas na taon sa bansa Ilan nga sa binigyang pansin ni Pope Francis, ay ang usapin ng Social Justice, pangangalaga sa dignidad ng mga mamamayan at patulong sa lahat ng mga nangangailangan.
Dito binigyang diin rin ng Santo Papa ang paglaban sa kahirapan na isang aniyang salik sa patuloy na hirap na nararanasan ng mga mamamayang Pilipino, kung saan hinamon ng nito ang lahat ng sektor ng lipunan na talikdan at iwasan ang anumang uri ng kurapsyon at katiwalian na umaangkin sa pondong nararapat para sa mga mahihirap.
Batay sa isinagawang pag-aaral ng IBON Foundation, umaabot sa 2-trilyong piso sa loob ng tatlong taon ang nasasayang na buwis ng mga mamamayan dahil sa katiwalian sa pamahalaan.