Sa isang makasaysayang sandali para sa Simbahang Katolika, napili ng College of Cardinals ang bagong Santo Papa.
Sa day 2 ng Conclave at ikatlong round ng pagpili ay lumabas ang puting usok mula sa tsimenea ng Sistine Chapel nang May 08, 6:08pm oras sa Vatican, hudyat sa buong mundo na may nahalal nang kapalit ang pumanaw na si Pope Francis bilang kahalili ni San Pedro.
Ang bagong Papa na si Cardinal Robert Francis Prevost, O.S.A. na gagamitin ang Papal Name na ‘Pope Leo XIV’, ay ipinanganak noong September 14 1955 na mula sa Chicago, Illinois sa Amerika.
Bago ang kanyang pagkakahalal, siya ay nagsilbing Prefect of the Dicastery for Bishops at Obispo ng Diyosesis ng Chiclayo sa Peru.
Kilala siya sa kanyang pagsisilbi ng halos tatlong dekada sa Peru bilang misyonero at kalaunan bilang obispo ng Chiclayo, siya rin ay naging Vice President ng Peruvian Bishops’ Conference, at naging pansamantalang tagapamahala ng ilang diyosesis tulad ng Callao at ngayon ay magsisilbi bilang ika-267 na kahalili ni San Pedro.
Matapos marinig ang tradisyonal na pag-anunsyo sa Latin na “Habemus Papam” na nangangahulugang ‘May Papa na tayo’, lumabas sa balkonahe ng St. Peter’s Basilica ang bagong halal na Santo Papa upang batiin ang mga mananampalatayang nagtipon sa St. Peter’s Square at ang milyun-milyong nanonood sa iba’t ibang panig ng mundo.
