26,474 total views
Nanawagan ng pagkakaisa at reporma ang Obispo ng Diyosesis ng Gumaca sa gitna ng krisis sa langis at transportasyon dulot ng nagaganap na kaguluhan sa Gitnang Silangan.
Sa pamamagitan ng isang liham pastoral, binigyang-diin ni Gumaca Bishop Euginius Cañete na ang patuloy na pagtaas ng presyo ng langis ay nagdudulot ng matinding hirap sa mga drayber, komyuter, at manggagawa.
Ayon sa Obispo, hindi lamang ito krisis sa enerhiya kundi krisis sa karapatang makapagtrabaho at makapamuhay nang may dignidad.
“Hindi lamang ito krisis ng langis, kundi krisis ng pagbiyahe upang maghanapbuhay. Ang transportasyon ay karapatan, hindi pribilehiyo. Ito ang daan upang makapagtrabaho, makapag-aral, makapagpagamot, at makapiling ang pamilya. Kapag pumalpak ang sistema ng transportasyon, ang mahihirap ang unang naiiwan.” Bahagi ng liham pastoral ni Bishop Cañete.
Hinimok din ni Bishop Cañete ang pamahalaan na magpatupad ng makatarungang reporma sa transportasyon at ekonomiya na tunay na maglilingkod sa mamamayan.
Nanawagan din ang Obispo ng sama-samang pagkilos mula sa pagtutulungan sa komunidad, pagtitipid sa konsumo ng langis, hanggang sa pananalangin at bolunterismo sa komunidad.
“Buong lakas nating ipinahahayag ang panawagan para sa tunay at sistemikong reporma sa transportasyon. Kailangan nating magtatag ng sistemang naglilingkod sa nakararami, kumikilala sa karapatan ng mga drayber, komyuter, at manggagawa, at nakaugat sa kabutihang panlahat.” Dagdag pa ni Bishop Cañete.
Sa kabila ng krisis, pinaalalahanan din ni Bishop Cañete ang mga mananampalataya na manatiling matatag sa pag-asa, sapagkat ang Muling Pagkabuhay ni Kristo ay paanyaya sa pagbabagong-buhay ng lipunan tungo sa katarungan at pagkakaisa.
