319 total views
Kapag panahon ng kapaskuhan, ang alaala ni Birheng Maria at ni San Jose ay isang mainam na punto para sa sa ating mga personal na year-end reflection. Kahit ano pa man ang ating kasarian, mapa-babae man o lalake, ang buhay ng kanilang pamilya ay makaka-inspire sa ating lahat, habang tayo ay nagbabalik-tanaw sa matatapos na taon at naghahanda para sa 2022.
Kapag iniisip natin ang Inang Maria, karaniwan naiisip natin ang ating mga ina, ang mga kababaihan, ang mga Maria sa ating paligid. Mas matingkad nga ang Canticle of Mary ngayon, dahil ngayong pandemya, mas maraming kababaihan ang nagsabi rin ng “Yes” sa bagong buhay; buhay kung saan sila ay mas pagod, mas hapo, mas naupos. At lahat ng ito, para lang sa kanilang mga minamahal.
Ang pandemya ay nagdala ng mas mabigat at mas maraming hamon sa kababaihan. Sa loob ng halos dalawang taon, mas maraming mga kababaihan ang nanguna sa paglaban sa pandemya sa loob at labas ng bahay. Ayon nga sa isang round-table discussion noong International Women’s Day 2021, 70% ng mga healthcare professionals at researchers na nagtatrabaho kaugnay sa COVID-19 ay mga babae.
Dito naman sa ating bansa, marami sa ating kababaihan ang nakaranas ng kawalan ng trabaho; hindi naman lingid sa ating kaalaman na malaking bulko ng mga nagtatrabaho sa informal sector at tourism industry ay mga babae. Marami sa kanila, nakabalik man sa trabaho, ay hindi pa rin nakakabawi. Tinatayang mga 44% ng mga nawalan ng trabaho noong 2020 ay mga babae.
Ang mga kababaihan din ang sumalo ng mas maraming trabaho sa bahay. Ayon nga sa 2021 National Household Care Survey ng Oxfam, PCW, UN Women, at WeEmpowerAsia, mga 13 hours kada araw ang ginugugol ng kababaihan sa bayan domestic work, kasama na dito ang pag-aalaga sa mga bata at seniors sa bahay. Nakita rin ng survey na one-third ng kanilang mga nasurvey ay nakaranas ng injury, pagkaka-sakit, o disability dahil sa trabahong bahay.
Kapanalig, ang pagsasabi ng Yes sa pagmamahal sa anak at pamilya ay hindi naman dapat magdulot ng kaparusahan o sakit sa mga kababaihan. Ang ating Mahal na Maria, tinanggap niya ang hamon ng pagkapamilya, pero hindi niya ito tinahak mag-isa. Sa kanyang pag-aalay ng buhay sa Diyos at pamilya, naging katuwang niya si San Jose. At bilang isang sagrada familia, naibunyag nila ang kaluwalhatian at kabutihan ng Diyos.
Ang ehemplo ni Inang Maria at San Jose ay sana’y ating maging inspirasyon. Pinupunan nila ang “gaps” o puwang sa pangangailangan sa kanilang buhay at bahay, at hindi hinayaang naghihirap ang katuwang. Pinakita nila na ang pagmamahal ay team work. Sa ating mundo ngayon kung saan ang gender-balance ay hinahamon ng panahon, ang pagtingin sa kanilang ehemplo ay maaring makatulong sa pagpapagaan ng pasanin ng kababaihan sa panahon ng pandemya.
Sumainyo ang Katotohanan.