406 total reads
Ipinaliwanag ni Fr. Antinio Joy Zaballa – Parish Priest ng San Sebastian Church, ang tunay na kahulugan ng “Dungaw” o ang pagsilip ng Birhen ng Del Carmen sa Poong Hesus Nazareno tuwing traslacion.
Ayon sa pari, ang poong Jesus Nazareno ang nagpapaalala na hindi dapat magbago ang pananampalataya ng mga Filipino sa Panginoon.
Dagdag pa niya, sa pamamagitan rin ni Hesus Nazareno, naaalala ng mga Filipino na hindi sila nag-iisa sa pagdaan sa mga pagsubok at mayroon silang kasama sa pagpapasan ng kanilang Krus.
Samantala, inihayag rin ng pari na, “Sa pagdungaw ng Mahal na Ina, makikita natin ang connection ng Ina sa Anak na gumawa ng kanyang misyon na iligtas ang sangkatauhan sa kasalanan at kamatayan.
“Kaugnay dito, upang lalong maitaguyod at maipagpatuloy ang kultura ng Dungaw, nanawagan si Fr. Zaballa na tulungan ang Basilica ng San Sebastian sa ginagawa nitong restoration.
“Ito po ang kanyang (Birhen ng del Carmen) kauna-unahang Shrine, ang Basilica ng San Sebastian na ngayon ay kinakailangang i-restore matapos ang 125 years na pagkakagawa, ito ay gawa ng bakal at medyo kinakain na ng kalawang kaya kailangang i-restore upang itong shrine na ito ay mapatagal ang buhay at maipamana pa natin,” pahayag ng pari sa Radyo Veritas.
Taong 1621 nang iluklok ang Birhen ng Del Carmen sa simbahan kung saan nakatayo ngayon ang Basilica of San Sebastian.
Sa kasalukuyan, ayon sa San Sebastian Basilica Conservation and Develoment Foundation, limang columns na ang una nitong narestore mula sa kabuuang bilang na 132 columns ng simbahan, tinataya namang aabot sa 250,000 piso ang halaga ng restoration process sa isang column.
