384 total reads
Nagpahayag ng pakikiisa ang Conference of Major Superiors in the Philippines–Justice, Peace and Integrity of Creation Commission (CMSP-JPICC) sa mga magsasaka, katutubo at tagapagtanggol ng kalikasan na patuloy na lumalaban sa mga aktibidad ng pagmimina sa Nueva Vizcaya.
Isinagawa ang solidarity mission mula Nobyembre 10 hanggang 12, 2026 sa mga komunidad sa Kasibu at Dupax del Norte, katuwang ang Franciscans International, Order of Friars Minor–Justice, Peace and Integrity of Creation (OFM-JPIC), Young Franciscan Advocates at Task Force Detainees of the Philippines.
Sa Kasibu, ibinahagi ng mga residente ang kanilang pagtutol sa mga aktibidad ng eksplorasyon ng North Luzon Mineral Resources Corporation (NLMRC), na may permit na sumasaklaw sa humigit-kumulang 4,456 ektarya.
Iginiit ng mga magsasaka na mas mahalaga ang mga lupang sakahan na pinagkukunan ng pagkain at kabuhayan ng kanilang mga pamilya kaysa sa yamang mineral na nakabaon sa kabundukan.
Nagbigay naman ng pag-asa sa mga residente ang desisyon ng Regional Trial Court noong Nobyembre 11, 2026 na tanggihan ang aplikasyon para sa preliminary injunction laban sa mga nagbabantay sa community barricade at alisin ang umiiral na temporary restraining order.
Gayunman, patuloy na hinihiling ng mga residente ang pagkansela sa exploration permit ng kumpanya.
Sa Dupax del Norte, ibinahagi naman ni Florentino “Tinong” Daynos II, pangulo ng Dupax del Norte Environmental Defenders, ang kanilang patuloy na pagtutol sa mga aktibidad ng eksplorasyon ng Woggle Corporation.
Ipinahayag din ng mga residente ang kanilang pangamba sa kakulangan umano ng makabuluhang konsultasyon, posibleng epekto sa kalikasan at mga kasong kinakaharap ng ilang miyembro ng komunidad.
Bagama’t pansamantalang sinuspinde noong Pebrero 2026 ang exploration permit ng kumpanya, hindi pa ito nangangahulugan ng tuluyang pagkansela nito.
Binigyang-diin ni Daynos na ang patuloy nilang pagbabantay sa barricade ay isang pananagutan sa susunod na henerasyon.
“Leaving or quitting on the barricade is tantamount to saying we quit on our children, and that we can never do,” ani Daynos.
Nakipagpulong din ang delegasyon kay Bayombong Bishop Jose Elmer Mangalinao at kay Fr. Crispin Costales, direktor ng Diocesan Social Action Center, upang talakayin ang patuloy na paggabay at pagtulong ng lokal na Simbahan sa mga komunidad na apektado ng mga usapin sa pagmimina.
Tinalakay rin ang posibilidad na maihatid sa United Nations ang mga hinaing ng mga residente sa pamamagitan ng Franciscans International. Kabilang dito ang pagsusumite ng mga ulat sa Universal Periodic Review at pakikipag-ugnayan sa mga eksperto ng UN tungkol sa karapatan ng mga katutubo, proteksiyon sa mga tagapagtanggol ng kalikasan at pananagutan sa pangangalaga sa kapaligiran.
Ayon kay CMSP-JPICC National Coordinator Rev. Fr. Angelito Cortez, OFM, mahalagang bahagi ng misyon ng Simbahan ang pakikiisa sa mga komunidad na nagtatanggol sa dignidad ng tao at pangangalaga sa sangnilikha.
Nagtapos ang solidarity mission sa pamamagitan ng sama-samang panalangin at pagbabasbas sa mga komunidad.
Muling pinagtibay ng misyon ang diwa ng Laudato Si’ ni Pope Francis na magkaugnay ang daing ng kalikasan at daing ng mahihirap.




