Ang smartphone mo kapanalig, hindi lang mainam para sa social media o panonood ng youtube. Mahalaga rin ito sa panahon ng delubyo.
Binabago ng mga smartphones ang pagharap ng sangkatauhan sa mga iba-ibang sakuna na nangyayari sa ating buhay. Hindi natin binibigyan ng halaga ang aspetong ito ng smartphones, kapanalig, pero maraming buhay na ang nasalba ng teknolohiyang taglay ng ating smartphones.
Isang halimbawa nito, kapanalig, ay ang pag-gamit nito ng mga Africans sa panahon ng isa sa pinakamatinding krisis sa kanilang kasaysayan. Ayon sa isang pag-aaral, noong panahong pumutok ang sakit na Ebola sa West Africa noong 2014–2016, ang contact tracing ay isa sa mga pinakamahalagang elemento ng pagpigil ng pagkalat ng epidemyang ito. Napakahirap kasi ng paper-based na contact tracing. Minsan hindi kumpleto ang nilalagay ng mga tao sa mga forms, maraming delay sa komunikasyon, minsan di na makita ang mga nakasalamuha ng may sakit.
Nung kahitikan ng epidemyang ito, sinubukan ng ilang mga eksperto ang ang pag-gamit ng app sa smartphone na tinawag na Ebola Contact Tracing Application o ECT App, na gawa ng Earth Institute ng Columbia University. Nakita nila na 63% ng mga contacts ang naabot ng app, kumpara sa 39% lamang gamit ang paper-based contact tracing. Hindi man perpekto, nagpakita ito ng malaking potensyal sa mas maayos at sistematikong contact tracing sa mga ganitong uri ng sakit at epidemya nangangailangan ng mabilisang aksyon.
Mahalaga ito, kapanalig, lalo na sa mga bansang gaya sa atin kung saan marami ang maralita at nakatira sa masisikip ang lugar. Sa mga informal settlements, kapag bumahing lang ang isang tao, marami na agad ang mahahawa. At dahil informal settlements, labas masok ang mga tao, at marami sa kanila, paroot parito kung saan-saang lugar.
Sa panahon ngayon na marami ang takot sa pagkalat pa ng Novel Corona Virus, ang pagdevelop ng contact tracing app na akma sa ating pangangailangan ay magiging isang malaking tulong sa pagkalma ng kalooban ng marami, at ng mas mabilis na pag-alam kung sino ang naapektuhan ng sakit na ito. Mas mainam na ito, diba kapanalig, kaysa sa pag-gamit ng smartphone sa pagkalat ng fake news?
Panlipunang katarungan, kapanalig, ang anumang gawain na magsusulong ng kapakanan ng balana, lalo na ng maralita. Pina-paalala ng Justicia in Mundo, bahagi ng panlipunang turo ng Simbahan, “Kung hindi natin pipigilan, ang impluwensya ng bagong teknolohiya ay papaboran lamang ang may kaya at kapangyarihan.” Nawa’y gamitin natin ng tama at makabuluhan ang teknolohiya gaya ng smartphones, kapanalig, lalo na’t nasa gitna ang sangkatauhan ng isang napakalaking hamon.
