38,879 total reads
Patuloy na nakararanas ng pagbaha ang ilang lugar sa Bulacan dahil sa magkakasunod na linggong pag-ulan dulot ng Habagat, ayon sa Diocese of Malolos.
Ayon kay Father Melchor Ignacio, Social Action Director ng Diocese of Malolos,nasa dalawang talampakan pa ang baha sa mismong presinto ng simbahan sa Hagonoy, habang umaabot naman sa apat hanggang limang talampakan ang tubig sa ilang bahagi ng parokya ngayong araw.
Mas malala ayon sa Pari ang sitwasyon noong nakaraang linggo nang magsabay ang tubig-baha at high tide, na umabot sa 4.9 feet at nagdulot ng matinding pagbaha sa loob ng ilang araw.
Ulat ng Pari, may mga residenteng nananatili pa rin sa evacuation centers gaya ng mga covered court at paaralan, bagama’t karamihan ay nananatili sa kanilang mga tahanan.
Samantala, umaabot sa Four Thousand food packs na ang naipamahagi ng Diocese of Malolos, habang patuloy ang monitoring at pagtulong sa mga residenteng inilikas habang nagbibigay rin ng relief goods ang ilang parokya, kabilang ang mga hot meals na inihahatid sakay ng bangka sa mga lugar na hindi madaling marating.
“Sa Diocese of Malolos, ang na-release na sa amin is more than 4,000 na rin naman yung napamigay na food packs. And then, last week ay patuloy ang pag-monitor at pagtulong sa mga inilikas. At the same time, may mga parishes din na nag-provide ng mga reliefs. At dito naman ay merong mga tao na may mabuting kalooban para magbigay ng kahit mga hot meals na nakabangka,” ayon sa panayam kay Father Ignacio sa Programang Caritas In Action
Kabilang sa mga lugar na patuloy na binabantayan ang Calumpit, partikular ang mga coastal areas na matagal nang nakararanas ng pagbaha. Ayon kay Father Ignacio, may ilang lugar na hindi tuluyang nawawalan ng tubig.
Kabilang din sa mga nangangailangan ng tulong ang ilang coastal communities mula sa Malolos, Obando at Hagonoy, kung saan tinatayang nasa 1,000 pamilya ang naapektuhan at nahirapang makalabas noong kasagsagan ng Habagat.
Bukod sa pagbaha, agad ding tutugon ang Diocese of Malolos sa mga pamilyang naapektuhan ng sunog sa Gintiva, Venezuela, sa pamamagitan ng pagpapadala ng food packs, habang ngayong araw ay nananatiling nakaabang lamang ang Diocese para sa iba pang mga lugar na maaaring mangailangan ng ayuda, lalo na habang nagpapatuloy ang pag-ulan.
“Siguro po, ang isa na dito ay food packs pa rin, kasi meron pa ring mga bahay na binaha. At kaninang umaga ay nagkaroon din ng sunog dito sa Gintiva, Venezuela, kung saan ay bahagi pa rin ito ng Diocese. So, doon ay magpapadala rin kami ng food packs doon sa mga pamilya na nasunugan,” bahagi pa ng panayam ng kay Fr. Ignacio
Para sa mga nais tumulong, maaaring makipag-ugnayan sa Jubilee Sheltering Program o JSP sa Lumang Bayan, Plaridel, Bulacan, na nagsisilbing sentro ng Diocese of Malolos para sa pagre-repack ng mga relief goods.
