647 total views
Ang paggunita sa ika-500 daang taong anibersaryo ng pagdating ng pananampalatayang Kristiyano sa bansa ay isang pagdiriwang sa makasaysayang yugto ng kasaysayan at pananampalataya ng mga Filipino.
Ito ang mensahe ni Apostolic Vicariate of Puerto Prinsesa Bishop Socrates Mesiona – Chairman ng CBCP Episcopal Commission on Mission kaugnay sa Pista ng Pananampalataya at Misyon isang online celebration ng Jubilee Year ng 500 Years of Christianity sa Pilipinas.
Ayon sa Obispo, hindi dapat maging hadlang ang patuloy na banta ng COVID-19 pandemic sa bansa upang makapagpahayag ng kasiyahan at pagpapasalamat ang mga Filipino sa biyaya ng pananampalatayang Kristiyano na ipinagkaloob ng Panginoon sa Pilipinas limang-daang taon na ang nakakalipas.
Ipinaliwanag ni Bishop Mesiona na ang paggunita sa ikalimang sentenaryo ng Kristiyanismo sa bansa ay isang pambihirang pagkakataon upang maipadama sa Panginoon ang lubos na pasasalamat.
“Tayo po ay nagsasaya dahil sa ating pong ipinagdiriwang ang isang makasaysayang yugto ng ating pananampalataya ang ikalimang siglo ng pagdating dito sa ating bansa. Ito po ay once in a lifetime na pangyayari sa ating buhay kaya dapat tayong magpahayag ng ating kasiyahan, magpasalamat sa Diyos dahil ito’y isang napakahalagang kaloob niya sa atin, kaya kahit tayo ay nasa gitna pa ng isang pagsubok sanhi ng pandemya na dala ng COVID-19 ay sinisikap natin ipadama at ipahayag ang ating taus-pusong pasasalamat sa Diyos…” mensahe ni Bishop Socrates Mesiona.
Ibinahagi ng Obispo na hindi nagkataon sa halip ay sadyang pinili at biniyayaan ng Panginoon ang mga Filipino ng pananampalatayang Kristiyano na dapat ay patuloy pang palaguin at palaganapin.ng bawat isa.
Una ng hinamon ng Kanyang Kabunyian Luis Antonio Cardinal Tagle – Prefect of the Congregation for the Evangelization of Peoples ang mga Filipino na patuloy pang palalimin at ipalaganap ang pananampalataya na natanggap ng bansa 500 taon na ang nakakalipas.
