11,487 total views
Nanawagan si San Jose Nueva Ecija Bishop Samuel Agcaracar, SVD sa mga mananampalataya na patuloy na ipanalangin at samahan ang mga pari sa gitna ng mga hamon sa kanilang bokasyon.
Ito ang mensahe ng Obispo sa ginanap na Chrism Mass noong Martes Santo, Marso 31, 2026 sa St. Joseph the Worker Cathedral.
Ayon kay Bishop Agcaracar, hindi maikakaila na may mga negatibong pananaw at paratang laban sa mga pari, ngunit hinikayat niya ang mga mananampalataya na tumugon sa pamamagitan ng panalangin at pag-unawa.
Paliwanag ng Obispo, kinakailangan ng mga lingkod ng Simbahan ang dasal, tulong, at pag-agapay ng bawat mananampalataya.
“Ipagdasal nyo kami. Tulungan nyo kami. Samahan nyo kami. Huwag kayong makiisa,” Bahagi ng pahayag ni Bishop Agcaracar.
Binigyang-diin din ng Obispo na hindi lamang mga pari ang dapat magsuri ng sarili, kundi maging ang mga layko na naglilingkod sa Simbahan.
Giit ni Bishop Agcaracar, hindi dapat na malimutan ng bawat isa ang kaakibat na misyon at pananagutan ng pagiging isang binyagan.
“Lahat tayo nakakalimutan natin ang diwa ng ating pagiging pinahiran ng Diyos… ang ating paglilingkod ba ay para sa Diyos?” Dagdag pa ni Bishop Agcaracar.
Pinagtibay rin ng Obispo ang kahalagahan ng pagkakaisa sa loob ng Simbahan, bilang isang pamayanang pinagbubuklod ng iisang pananampalataya.
Ayon kay Bishop Agcaracar, ang pagkakahati-hati ay taliwas sa tunay na diwa ng Simbahan, sapagkat iisa lamang ang langis na ipinapahid sa bawat isa, ang langis ni Kristo na sumasagisag sa pagkakaisa ng lahat.
Hinimok din ng Obispo ang mga pari at layko na pairalin ang pagmamalasakit, pagpapatawad, at pakikipagkaisa sa isa’t isa bilang bahagi ng kanilang paglilingkod sa Simbahan at pamayanan.
“Let’s continue to do our own mission. We are sent because we are called and anointed. But we can never do our mission if we are not united. No matter how beautiful the churches that we build, if we are not united, we only continue to hurt one another and our people. May that calling of poverty continue to challenge us and inspire us to reach out as a church, to go out as a church.” Ayon pa kay Bishop Agcaracar.
Samantala, pinaalalahanan din ng Obispo ang lahat, na ang bawat isa ay tinatawag at isinugo upang gampanan ang kani-kanilang misyon sa Simbahan.
Umaasa rin si Bishop Agcaracar na ang diwa ng kahirapan, kababaang-loob, at paglilingkod ay magtutulak sa Simbahan na higit pang mag-abot ng tulong at malasakit sa kapwa, lalo na sa mga higit na nangangailangan.
Batay sa tala, katuwang ni Bishop Agcaracar sa pangangasiwa sa buhay espiritwal ng may higit sa 600,000 Katoliko sa 21-parokya sa Diyosesis ng San Jose Nueva Ecija ang 35 mga Pari.
