10,929 total views
Hinimok ni Lipa Archbishop Gilbert Garcera, Pangulo ng Catholic Bishops’ Conference of the Philippines (CBCP), ang mga mananampalataya na gawing makabuluhan ang pagdiriwang ng Semana Santa bilang panahon ng pagninilay, pagbabalik-loob, at pagkakaisa ng pamilya.
Ayon kay Archbishop Garcera, ang Semanta Santa o Holy Week ay taunang paggunita sa pagpapakasakit, kamatayan, at muling pagkabuhay ni Hesukristo, na siyang sentro ng pananampalatayang Kristiyano.
Ipinaliwanag ng arsobispo na higit pa sa tradisyunal na pagdiriwang, ito ay pagkakataon para sa mga pamilya at komunidad na magsama-sama hindi lamang para sa reunion kundi upang manalangin, magnilay, at magbagong-buhay.
“The Holy Week celebration is our annual way of reflecting and celebrating the passion, death, and resurrection of Christ,” pahayag ni Archbishop Garcera.
Hinimok din niya ang mga mananampalataya na samantalahin ang linggong ito upang suriin ang mga sarili at kilalanin ang mga kasalanan laban sa Diyos na nagmamahal.
“I encourage you, my dear brothers and sisters, as we celebrate this Holy Week to make sure that we respond to a moment of reflection, a moment of conversion, and a moment of rejoicing because the Lord is alive in us,” ayon sa arsobispo.
Dagdag pa ni Archbishop Garcera, mahalaga ang sama-samang pananalangin ng pamilya, paglapit sa sakramento ng kumpisal, at pagtanggap sa Panginoong Hesukristo upang tunay na maranasan ang Kanyang presensya.
Umaasa ang arsobispo na sa pagtatapos ng mga Mahal na Araw, muling mabubuhay si Kristo sa puso ng bawat isa at sa mga pamayanan.
“I hope that during this week, it’s really a time for the family, praying together, going to confession, receiving the Lord, and making sure that at the end of this week, Christ is alive in our midst,” saad ni Archbishop Garcera.
