13,445 total views
Homiliya para sa Miyerkoles Santo, 1 Abril 2026, Mat 26:14-25
Kagabi, nagbigay ako ng rekoleksyon tungkol sa apat na tula ni propeta Isaias tungkol sa tinatawag kong Mahiwagang Lingkod. Apat na tula na hindi pinapalitan o binabago sa mga pagbasa taon-taon tuwing Holy Week: iyung una—binabasa tuwing Lunes Santo (42:1-7), ang pangalawa—tuwing Martes Santo (49:1-6), ang pang-apat naman ay sa Biyernes Santo (53:1-12). Ang pangatlo ay ngayon Miyerkoles Santo (50:4-9).
Itong apat na ito ang naging pundasyon ng pagsusumikap ng mga unang alagad na mabigyang kahulugan ang pagdurusa at kamatayan sa krus ni Jesus Nazareno, kahit wala siyang kasalanan. Hindi na parusa o pagsubok ang tingin sa pagdurusa sa mga panulat na ito ng propeta, kundi kakaibang paraan ng pagliligtas: redemptive suffering o pagdurusang tumutubos.
Ang mga kuwentong superheroes kadalasan ay kuwentong pagliligtas. Mamamagitan ang superhero para hindi mapahamak ang ililigtas niya. Pero siya mismo, hindi naman napapahamak. Dito kakaiba ang paraan ni Hesus, na naunawaan ng mga unang Kristiyano bilang katuparan ng paraan ng pagliligtas ng Mahiwagang Lingkod. May kapalit ang kaligtasan ng inililigtas—ang pagkapahamak ng nagliligtas. Ang tawag natin dito sa Tagalog ay pagtubos. Sariling buhay ang kapalit bilang pantubos sa minamahal.
Magpahanggang ngayon, parang ito ang napaka-hirap unawain at tanggapin tungkol sa paraan ni Kristo. Malinaw na malinaw ito lalo na sa konteksto ng nagpapatuloy na giyera sa Middle East. Walang gustong magpaubaya o magbigay. Para sa America, kung susunod ang Iran sa 15 kundisyon ni Trump, ititigil nila ang giyera. Para sa Iran, sila ang inatake, at ang pag-atake nila at pagsara sa Strait of Hormuz ay ganti lang nila sa ginawa sa kanila. Titigil sila at bubuksan ang strait of Hormus kung aamin ang Amerika at Israel sa pagkakamali nila, kung pagbabayaran nila ang idinulot na perwisyo sa bansa nila.
Tatlong relihiyon ang sakangkot sa giyerang ito: Hudyo, Kristiyano, at Muslim—na kung tutuusin ay pare-pareho ang pinagmulan , kaya tinatawag na Abrahamic faiths, o pananampalatayang nagmula kay Abraham. Pero kakaiba ang tinig ni Papa Leon nitong mga nagdaang araw. Sabi niya, “Hindi pwedeng gamitin ang relihiyon bilang justification sa giyera. Paglapastangan sa ngalan ng Diyos ang paggamit sa Diyos bilang justification ng giyera.” Sabi pa niya, “Ang panalangin ng mga taong walang makitang ibang solusyon sa hidwaan kundi giyera ay hindi pakikinggan ng Diyos, dahil may bahid na dugo ang mga kamay nila.”
Ayon kay San Juan, batay sa kanyang kuwento ng pasyon, mulat daw si Hesus sa nangyayari sa kanya. Pero nanindigan pa rin siya, hindi umatras. Alam niyang ipagkakanulo siya, ipapaaresto at papatawan ng parusang bitay, pero hindi siya umalma o lumaban. Hindi rin niya pinayagan ang mga alagad niya na gumamit ng armas para ipagtanggol ang sarili.
Tama si San Pablo sa pangaral niya sa mga Kristiyano sa Roma: “Idalangin ninyo sa Diyos na pagpalain niya, kahit ang mga umuusig sa inyo. Pagpalain n’yo sila sa halip na sumpain. Makigalak sa mga nagagalak, makipagluksa sa nga nagluluksa… Huwag gantihan ng masama ang masama. Talunin ang kasamaan sa pamamagitan ng kabutihan.” (Rom 12:9-17)
