131,080 total reads
Unti-unti nang naaalis ang maskara ng mga mastermind sa 545-bilyong pisong collusion sa flood control projects ng pamahalaan.
Nagiging klaro na ang lahat, ang halos lahat ng mga flood control projects ng pamahalaan ay konektado sa mga kongresista maging ng mga Senador. Ang bilyun-bilyong pisong kontrata ay pabuya ng mga mambabatas sa kanilang mga kamag-anak at mga nagdonate sa kanilang kampanya para manalo sa halalan.
Ito ay multi-bilyong pisong “utang na loob” scam, sa pagitan ng mga mambabatas, opisyal ng DPWH, COA, at mga kaalyadong kontraktor. Nagsimula ang matinding katiwalian sa mga flood control projects ng gobyerno sa administrasyon ng dating pangulong Rodrigo Duterte at noo’y DPWH secretary Mark Villar na nahalal namang Senador. Bago pa nabunyag sa pamumuno ni DPWH secretary Manuel Bonoan ay boom na boom na sa anim taong panunungkulan ni Villar ang laganap na katiwalian sa flood control projects.
Kapanalig, ang multi-bilyong pisong budget insertions ay laganap na noong pang administrasyon ni dating pangulong Duterte.
Nabunyag sa pagdinig ng Senate Blue Ribbon committee sa collusion sa flood control projects ng pamahalaan bago pa sumikat sa 40-luxury vehicles si Cezarah Rowena Discaya ay nakipag-joint venture na ito sa CLTG Builders nap ag-aari ng ama ni Senador Bong Go sa multi-bilyong pisong flood control projects sa Davao city. Ang sabi ni Senador Go, walang siyang kinalaman., wala siyang alam sa joint venture at palpak na flood control projects. “Wala akong alam”, ito ang sumisikat na litanya ng mga mambabatas sa iniimbestigahang katiwalian.
Natuklasan naman sa pagdinig ng House Committee on Public Accounts, Good Government and Accountability at Public Works “in-aid-of-legislation” na tumanggap si Senate President Francis “Chiz” Escudero ng 30-milyong pisong campaign donation sa may-ari ng Centerways Construction. Kapalit nito ang pagkupo ng Centerways ng multi-bilyong pisong flood control projects sa Bicol region particular na sa Sorsogon na lalawigan ng Senador. Inamin ng Senador ang donasyon, pero wala siyang alam sa mga proyektong ibinigay sa Centerways.
Idinawit naman ng sinibak na district engineer ng DPWH sa Bulacan na si Henry Alcantara ang pangalan ni Senador Joel Villanueva sa maanomalyang flood control projects sa Bulacan particular na ang proyekto na binisita ng pangulong Ferdinand Marcos Jr., na naging mitsa ng expose sa flood control projects scam. Eh, wala din alam si Senador Villanueva? Bakit daw siya?
Sa expose ni Senador Panfilo Lacson na 70-Senador at Kongresista ang may kinalaman sa laganap na katiwalian sa flood control projects., 18 pa lamang ang natukoy na.
Ito ay sina Senate President Francis Escudero, Senador Joel Villanueva., Senador Bong Go at mga kongresista na sina AKO-Bicol partylist representative Zaldy Co, Ferdinand Beltran, Cong.Edwin Gardiola,Cong.Munir Arbison Jr., Cong.Jolo Revilla., Congresswoman Lanie Mercado-Revilla., Cong.Bryan Revilla,Cong.Rudge Gutierrez, Congresswoman Caroline Agyao, Cong.Carlos Luria,Congresswoman Tina Pancho at Congresswoman Cristina Angeles.
Kapanalig, nararapat sa mga mambabatas na ito na idiskulipika sa puesto at ikulong.
Ika nga sa kasabihan, walang naitatagong lihim..Sinasabi din ng (John 8:32) “The truth will set you free”.
Sumainyo ang Katotohanan.
