285 total views
Tutugunan ng NDF o National Democratic Front ang nais ng Pangulong Rodrigo Duterte na lagdaan na ang bilateral ceasefire agreement sa pagitan ng GRP at ng NDF.
Ayon kay dating Bayan Muna representative Satur Ocampo, ito ang sinabi ni Luis Jalandoni ng NDF sa hamon ng Pangulo na pakakawalan ang mga political prisoners sa loob ng 48 oras sa sandaling malagdaan ang kasunduan.
Gayunman, sinabi ni Ocampo na sa panig ng NDF ipatutupad lamang nila ang bilateral ceasefire agreement kung isasakatuparan ni Duterte ang sinasabi nitong pagpapalaya sa mga bilanggong-pulitikal.
“Susunod sila sa usapan. Sa Enero. Sabi ng NDF puwede silang pumirma sa bilateral ceasefire agreement pero ang pagpapatupad noon makaraang tumupad si Duterte sa sinasabi niya na pag nalagdaan yun ire-release niya ang mga bilanggong pulitikal, saka lamang puwedeng ipatupad ang bilateral ceasefire agreement,” pahayag ni Ocampo sa panayam ng Radio Veritas.
Sinabi pa ni Ocampo, na binigyan ng CPP o Communist Party of the Philippines ang Pangulong Duterte ng hanggang Enero ng 2017 para tuparin ang pangako nito bago muli ang peace negotiation sa Enero a-18 hanggang a-25.
“Nagsabi din ang CPP na bibigyan si Duterte hanggang Enero para tuparin ang pangako niya at pangako ng GRP na palayain ang mga nasa listahan na binigay ng NDF bago mag-resume ang peace negotiation sa January 18-25.”
Kaugnay nito, tiniyak ni GRP peace negotiator Silvestre Bello III na palalayain ng Pangulong Duterte ang mga political detainees sa loob ng 48 oras sa sandaling malagdaan ng GRP at NDF ang bilateral ceasefire agreement.
Nilinaw ni Bello na ang pagpapalaya sa mga ito ay hindi pre-condition sa ceasefire agreement kundi ito ay isang “confidence building measures” upang mabawasan ang mga pagsalakay at para ipakita ang sinseridad sa usapang pangkapayapaan.
Gayunman nangako ang Pangulo na palalayain niya ang ilang matatanda at may sakit na rebelde bago mag-Pasko.
Nasa 88 ang matatanda at 48 ang mga maysakit na political prisoners.
Una ng binigyang diin ni Pope Francis na hindi kailanman makakamit ang kapayapaan sa pamamagitan ng pag-aarmas kundi sa isang payapang dayalogo
