Inihayag ni Senador Leila De Lima na hinding hindi siya titigil sa kanyang laban may kinalaman sa nagaganap na extrajudicial killings o yung mga death under investigation sa bansa.
Ayon sa senadora, ito ay kahit na may pagbabanta na sa kanyang buhay at sobra ng galit sa kanya ang Pangulong Rodrigo Duterte mula nang maihain niya ang resolusyon para imbestigahan ang kaso ng EJK.
Pahayag ni de Lima, titigil lamang siya sa kanyang laban kung titigil na rin ang mga pagpatay.
“Hindi katanggap tanggap sa akin ang EJK, and there’s really nothing personal on my part sa advocacy ko against EJK, hihinto lang ako kung hihinto din ang EJK, sobra pagbatikos niya sa akin, love hate relations before now purely hate na, wala na po siyang nasasabing maganda tungkol sa akin, I think at that time na file ko na ang resolution ko if he expected na hihinto ako maling akala niya yun, hihinto lang ako kung hihinto lang ang EJK.” Ayon kay de Lima sa panayam ng programang Veritasan.
Sa nakalipas na 6 na buwan, higit 6,200 na ang napaslang sa operasyon ng gobyerno kontra iligal na droga.
Matatandaang chairperson pa lamang ng Commission on Human Rights si De Lima ay may hidwaan na sila ni Duterte na noon ay alkalde pa lamang ng Davao City bunsod ng kaso ng mga EJK kung saan may mga menor-de-edad na mga biktima may kinalaman sa iligal na droga.
Pahayag ni De Lima, maninindigan siya at hindi kailanman uurong sa kanyang mga laban gaya ng pagkondena at paglaban sa EJK, katiwalian, pagbabalik ng death penalty, pagpapababa sa edad ng mga nagkasala sa krimen, pang-abuso sa kapangyarihan at iba pa.
“Hanggat kaya ko gagawin ko trabaho ko bilang senador maninindigan pa rin akon sa aking mga ipinaglalaban, I will definitely continue opposing and condemning EJK, the re-imposition of death penalty, lowering the age of criminal responsibility, acts of corruption, abuses of powers, condemn and oppose any acts towards totalitarianism and authoritarianism.” Ayon pa sa senadora.
