569 total views
Nagpahayag ng lubos na pagkabahala ang Catholic Bishops Conference of the Philipines o C-B-C-P sa napakaraming namamatay at napapatay dahill sa paglaban ng pamahalaan sa illegal na droga sa bansa.
Sa ipinalabas na pastoral statement, binatikos ng C-B-C-P ang umiiral na “reign of terror” o marahas at madugong pamamaraan ng pamahalaan sa pagsugpo ng iligal na droga dahil sa kawalan ng paggalang sa batas at buhay ng tao.
Binigyan-diiin ng CBCP na hindi pagpatay sa mga hinihinalang gumagamit at nagtutulak ng droga ang lunas sa laganap na industriya ng iligal na droga sa bansa.
“Labis kaming nababahala, kaming inyong mga Obispo, sa maraming namamatay at pinapatay sa pagsugpo sa ipinagbabawal na gamot o droga. Totoong malaking problema ang droga. Dapat itong sugpuin at pagtagumpayan. Pero ang lunas ay wala sa pagpatay ng mga pinaghihinalaang gumagamit o nagtutulak ng droga. Hindi lang kami nababahala sa mga pinatay. Nakababahala din ang kalagayan ng mga pamilya ng mga nasawi. Mas lalong pinahirapan ang buhay nila. Nakababahala rin ang takot na naghahari sa maraming lugar ng mga mahihirap.” bahagi ng liham pastoral ng CBCP.
Naninindigan ang kapulugan ng mga Obispo na sa pamamagitan ng rehabilitasyon at pagkakataong magbago ang mga nalulong dito sa pamamagitan ng gabay ng katotohanan at katarungan.
Inihayag din ng CBCP ang pagkaalarma sa pagiging manhid ng lipunan sa mga pagpatay na walang napapagot sa batas.
“Marami ang nasasawi na hindi naman droga ang dahilan. Hindi na napananagot ang mga pumapaslang. Mas lalong nakababahala ang pagiging manhid ng marami sa ganitong katiwalian. Itinuturing na lang na ito ay normal, at ang masama pa ay iniisip ng marami na nararapat lang daw itong gawin.Nakikiisa kami sa layuning pagbabago na hinahangad ng marami nating mga kababayan. Ngunit ang pagbabago ay dapat gabayan ng katotohanan at katarungan. May mga batayang aral na ating pinaninindigan.” paninindigan ng CBCP
Nilinaw ng CBCP ang mga dahilan ng pagtatanggol nito sa buhay dahil ang buhay ng tao ay regalo at nagmula sa Diyos.
“Ang buhay ng bawat tao ay galing sa Diyos. Ito ay kanyang kaloob at siya lang ang makababawi nito. Kahit ang pamahalaan ay walang karapatan na kumitil ng buhay sapagkat siya ay katiwala lamang ng buhay at hindi ang may-ari nito.”diin ng CBCP
Iginiit ng CBCP na ang pagsira ng sariling buhay at buhay ng iba ay isang malaking kasalanan at nagdudulot ng kasamaan sa lipunan.
“Ang pagsira ng sariling buhay at ng buhay ng iba ay isang malaking kasalanan at nagdudulot ng kasamaan sa lipunan. Ang paggamit ng droga ay tanda ng pagpapawalang-halaga sa sariling buhay at nagbibigay ng panganib sa buhay ng iba. Dapat pagtulung-tulungan nating lahat na malutas ang problema sa droga at suportahan ang rehabilitasyon ng mga nalulong ditto. Ang bawat isa ay may karapatang maturing na walang sala hanggang mapatunayan na siya ay nagkasala. Ang lipunan ay may pamamaraan at proseso upang mahuli, mapatunayan ang kasalanan, at maparusahan ang gumagawa ng krimen. Ang prosesong ito ay dapat sundin, lalo na ng mga alagad ng batas.”pahayag ng mga Obispo
Tinukoy ng CBCP ang malalim na ugat ng problema ng droga at kriminalidad ay ang kahirapan ng nakararaming mga tao, ang pagkasira ng pamilya, at ang korapsyon sa lipunan na dapat solusyunan ng pamahalaan at Simbahan.
“Ang malalim na ugat ng problema ng droga at ng kriminalidad ay ang kahirapan ng nakararaming mga tao, ang pagkasira ng pamilya, at ang korapsyon sa lipunan. Ang nararapat na hakbang na dapat nating gawin ay sugpuin ang kahirapan, lalo na ang pagbibigay ng permanenteng trabaho at sapat na sahod sa mga manggagawa. Palakasin at itaguyod ang pagkakaisa at pagmamahalan ng mga mag-anak. Huwag payagan ang mga batas na lulusaw sa pagkakaisa ng mga pamilya. Dapat ding unahin ang pagtatama at pagtatanggal sa mga tiwaling pulis at korapsyon sa mga hukuman. Ang napakabagal napagsulong ng mga kaso sa hukuman ay isang malaking dahilan ng paglaganap ng kriminalidad at kawawang kalagayan ng mga nasa kulungan. Kadalasan ang mga mahihirap ang nagdurusa sa ganitong sistema.Nananawagan din kami sa mga nahalal na mga politiko na paglingkuran ang pangkalahatang kabutihan ng bayan at hindi ang sariling interes.”
Ipinaalala ng CBCP na ang
pagsang-ayon at pagsasawalang-kibo sa kasamaan ay pakikiisa na rito.
“Kapag pinabayaan natin ang mga nalulong sa droga at nagtutulak nito, tayo ay bahagi na ng drug problem. Kapag sinang-ayunan o pinabayaan natin ang patuloy na pagpatay sa mga itinuturing na lulong sa droga at mga nagtutulak nito, kasama na tayong mananagot sa pagpatay sa kanila”.pahayag ng CBCP
Tiniyak naman ng CBCP na ang Simbahan ay magiging katuwang ng pamahalaan upang labanan ang kahirapan sa pamamagitan ng mga programa at sa pagiging simbahan ng mga dukha.
“Pagsusumikapan naming mga namumuno sa Simbahan na isulong at ipagpatuloy pa ang mga programa na makatutulong sa pag-aangat sa kalagayan ng mga mahihirap, tulad ng mga programang pangkabuhayan, edukasyon at pangkalusugan. Higit sa lahat, isasabuhay namin, at nating lahat, ang pagiging tunay na Simbahan ng mga dukha.”diin ng CBCP
Hinimok ng CBCP ang mga Pilipino na matakot at magsawalang kibo bagkus pairalin ang lakas ng loob at lakas na dulot ng pananampalatayang Kristiyano.
Ang liham pastoral ay binasa sa Sunday masses ng lahat ng Simbahan sa bansa.
“Huwag sanang mamayani sa atin ang takot at pagsasawalang-kibo. Pairalin sana natin hindi lang ang lakas ng loob, kundi ang lakas na dulot ng pananampalatayang Kristiyano. Nangako ang ating Panginoong Jesus:“Magdaranas kayo ng kapighatian sa mundong ito, ngunit tibayan ninyo ang inyong loob! Napagtagumpayan ko na ang sanlibutan.” (Juan 16:33) “Sino ang makapaghihiwalay sa atin sa pag-ibig ni Cristo? Ang kaguluhan kaya, ang kapighatian, pag-uusig, pagkagutom, kahirapan, panganib, o kamatayan? ….Hindi! Sa lahat ng mga ito, tayo’y magtatagumpay sa pamamagitan niya(ni Cristo) na nagmamahal sa atin.” (Roma 8:35,37) Oo nga, “sapagkat ang Espiritung nasa inyo ay mas makapangyarihan sa espiritung nasa mga makasanlibutan.” (1 Juan 4:4)
Sa pinakahuling datos ng Philippine National Police, umaabot na sa 7,080 ang napatay dahil sa paglaban ng pamahalaan sa iligal na droga sa bansa.
