56,247 total reads
Mga Kapanalig, noong katapusan ng Enero, nag-viral ang isang Facebook post kung saan inakusahan ng sexual harassment ang isang driver ng isang TNVS o transportation network vehicle service. Ikinuwento ng nag-post, na isang estudyante, na kinailangan nilang bumabâ ng kapatid niya sa kalagitnaan ng biyahe nila pauwi, dahil sa kalaswaang ginawa diumano ng driver. Kalakip din ng kanyang kuwento ang screenshot mula sa app na naglalaman ng buong pangalan ng driver, at ng kulay, modelo, at plaka ng sasakyan niya.
Agad na pinabulaanan ng driver ang paratang. Sa nag-viral din na post, sinabi ng driver na naiintindihan niya kung paano na-misinterpret ng kanyang pasahero ang mga kilos niya noong oras na iyon. Pero ipinaliwanag niya na ang kanyang paghingal at paghimas sa tiyan ay hindi dahil may ginagawa siyang kalaswaan, gaya ng akala ng estudyante. Siya raw ay overweight, may hika, at busog dahil kakakain lamang niya ng hapunan.
Ilang araw hindi bumiyahe ang driver dahil pansamantalang sinuspinde ang kanyang account habang iniimbestigahan ang nangyari. Pagkatapos suriin ang audio recording ng biyahe, at ang profile at performance history ng driver, nagpahayag ang kompanya ng TNVS na walang sapat na ebidensya ang mga paratang sa driver. Ni-reactivate nito ang account ng inireklamong driver. Nakausap na rin daw nila nang hiwalay ang driver at ang pasahero tungkol sa kanilang pasya.
Pero bago ang hatol ng kompanya, mabilis na nagbigay ang mga netizens ng kanilang opinyon tungkol sa nangyari. Maraming pumanig sa driver, kasunod ng kanyang pagpapaliwanag at ng mabubuting kuwentong ibinahagi ng mga kakilala at iba pang naging pasahero niya. Inaway ng ibang netizens ang estudyanteng nag-akusa sa driver. May mga nagpakalat ng mga litrato ng estudyante, nang-insulto ng kanyang itsura at katawan, at nagpadala ng mga hate messages sa kanyang Facebook account. Habang isinusulat natin ang editoryal na ito, naka-deactivate pa rin ang Facebook account ng estudyante.
Makatwiran ang takot na naramdaman ng estudyante habang nasa biyahe, lalo na’t matagal nang isyu ang sexual harassment at madalas itong nararanasan ng kababaihan. Pero hindi tamang ilantad ang personal na impormasyon ng iba sa social media, lalo na’t talamak ang cyberbullying at ang tinatawag na cancel culture, kung saan dinudumog ng netizens ang mga tao o grupong gumawa ng mga bagay na hindi katanggap-tanggap, kahit pa walang matibay na ebidensya. Sila ay ipinapahiya online sa iba’t ibang pamamaraan, gaya ng pagpapakalat ng mga litrato, panlalait, at pagpapadala ng hate messages, na ginagawa ng netizens ngayon sa estudyanteng pasahero.
Tila ito ang katumbas ngayon ng kaparusahan noon na “stoning to death.” Ngunit sa isang kuwento sa Bibliya, sa Juan 8:7, nang dalhin ang isang makasalanang babae kay Hesus upang bigyan ng kaparusahan, sinabi Niya sa taumbayan, “Ang sinumang walang kasalanan ang siyang maunang bumato [sa babae].”
Mga Kapanalig, pinaaalalahanan tayo ni Hesus na maging mapagpatawad, mamuhay nang banal, at mag-ingat sa ating mga salita at aksyon na maaaring makasakit sa iba. Mali ang sexual harassment, pero hinding-hindi rin magiging makatarungan ang pang-aaway at pambu-bully online. Gaya ng sabi ni Pope Francis, bagamat kinokonekta ng social media ang mga tao, nagiging instrumento rin ito ng hindi paggalang sa isa’t isa. Maging maingat tayo sa ating mga salita at aksyon online nang hindi tayo makasakit sa iba. ‘Ika nga, think before you click.
Sumainyo ang katotohanan.
