4,425 total views
Sabado sa Ika-4 na Linggo ng Apatnapung Araw na Paghahanda
Jeremias 11, 18-20
Salmo 7, 2-3. 9bk-10. 11-12
Panginoon, aking Diyos,
pag-asa ko sa ‘yo’y lubos.
Juan 7, 40-53
Saturday of the Fourth Week of Lent (Violet)
UNANG PAGBASA
Jeremias 11, 18-20
Pagbasa mula sa aklat ni propeta Jeremias
Ipinabatid sa akin ng Panginoon ang masamang balak laban sa akin ng mga kaaway ko. Ako’y parang maamong tupang dinadala sa patayan at hindi ko nalalamang may masamang balak pala sila sa akin. Wika nila, “Putulin natin ang puno habang malusog; patayin natin siya nang wala nang makaalaala pa sa kanya.”
At dumalangin si Jeremias, “Panginoon, ikaw ay hukom na makatarungan. Nababatid mo ang isipan at damdamin ng bawat tao. Ikaw ang maghiganti sa mga taong ito; ipinauubaya ko po sa iyo ang aking gawain.”
Ang Salita ng Diyos.
SALMONG TUGUNAN
Salmo 7, 2-3. 9bk-10. 11-12
Panginoon, aking Diyos,
pag-asa ko sa ‘yo’y lubos.
Panginoon, aking Diyos, sa iyo ko natagpuan
yaong aking minimithi at hangad na kaligtasan;
iligtas mo sana ako, sa pag-usig ng kaaway,
tinutugis nila ako, hindi sila naglulubay.
Kapag ako ay inabot, sila’y leon ang katulad,
tatangayin nila ako, sa malayo itatakas;
at kung ito ang mangyari, pihong walang magliligtas,
dudurugin nila ako, luluraying walang habag.
Panginoon, aking Diyos,
pag-asa ko sa ‘yo’y lubos.
Humatol ka sa panig ko yamang ako’y di masama.
Pigilin ang di matuwid sa kanilang mga gawa,
yaon namang mabubuti ay bigyan ng gantimpala;
yamang ikaw, Panginoon, ay ang Diyos na dakila,
at sa iyo ay di lingid ang laman ng puso’t diwa.
Panginoon, aking Diyos,
pag-asa ko sa ‘yo’y lubos.
Ikaw rin po, Panginoon, ang sa aki’y nag-iingat,
ang lahat ng masunurin sa iyo ay naliligtas;
ikaw ang Diyos na matuwid, isang Hukom na matapat,
laging handang magparusa sa sinumang gawa’y linsad.
Panginoon, aking Diyos,
pag-asa ko sa ‘yo’y lubos.
AWIT-PAMBUNGAD SA MABUTING BALITA
Lucas 8, 15
Mapalad ang nag-iingat
sa kanyang pusong matapat
sa Salitang nagbubuhat
sa Poong D’yos ng liwanag,
sa t’yaga’y aaning ganap.
MABUTING BALITA
Juan 7, 40-53
Ang Mabuting Balita ng Panginoon ayon kay San Juan
Noong panahong iyon, marami sa mga nakarinig kay Hesus ang nagsabi, “Tunay ngang ito ang Propetang hinihintay natin!” “Ito nga ang Mesias!” sabi ng iba. Ngunit sumagot naman ang iba pa, “Maaari bang magmula sa Galilea ang Mesias? Hindi ba sinabi ng Kasulatan na magmumula ang Mesias sa lipi ni David, at sa Betlehem na bayan ni David ipanganganak?” Magkakaiba ang palagay ng mga tao tungkol sa kanya. Ibig ng ilan na dakpin siya, ngunit wala namang nangahas humuli sa kanya.
Ang mga kawal na bantay sa templo ay nagbalik sa mga punong saserdote at sa mga Pariseo. “Bakit hindi ninyo siya dinala rito?” tanong nila sa mga bantay. Sumagot sila, “Wala pa pong nagsalita nang gaya niya!” “Kayo man ba’y nalinlang din?” Tanong ng mga Pariseo. “Mayroon bang pinuno o Pariseong naniwala sa kanya? Wala! Mga tao lamang na walang nalalaman sa Kautusan ang naniniwala sa kanya – mga sinumpa!” Isa sa mga naroon ay si Nicodemo, na nagsadya kay Hesus noong una. Tinanong niya sila, “Labag sa ating Kautusan na hatulan ang isang tao nang di muna nililitis at inaalam kung ano ang kanyang ginawa, hindi ba?” Sumagot sila, “Ikaw ba’y taga-Galilea rin? Magsaliksik ka’t makikita mo na walang propetang magmumula sa Galilea.”
At umuwi na ang bawat isa.
Ang Mabuting Balita ng Panginoon.
PANALANGIN NG BAYAN
Ikaapat na Linggo ng Kuwaresma
Sabado
Habang inaalaala natin ang hindi pagtanggap sa Tagapaglitas na nagpakasakit para sa ating kapakanan, hilingin natin ang pananampalataya ng isang aba upang maihatid natin sa iba ang mensahe ni Kristo sa pamamagitan ng ating mga salita at gawa.
Panginoon, dinggin mo ang aming panalangin.
o kaya
Ikaw ang aming lakas, O Panginoon.
Ang mga maykapangyarihan nawa’y patnubayan ng espiritu ng pananampalataya, manalangin tayo sa Panginoon.
Ang mga nagpapalaganap ng mensahe ng Ebanghelyo sa lahat ng dako nawa’y pagkalooban ng tapang, manalangin tayo sa Panginoon.
Ang mayayamang banasa nawa’y maging bukas-palad sa pagtulong sa mga mahihirap na bansa, manalangin tayo sa Panginoon.
Ang mga maysakit, mga bilanggo, mga matatanda, at mga may kapansanan nawa’y palakasin ng mga nakapagpapaginhawang Salita ng Diyos, manalangin tayo sa Panginoon.
Ang mga namayapang tapat sa Panginoon nawa’y magtamasa ng ipinangakong kapayapaang walang hanggan, manalangin tayo sa Panginoon.
Ama ng lahat,
isinugo mo ang iyong bugtong na Anak upang kami ay higit na ilapit sa iyo. Patnubayan mo kami sa aming misyon na palaganapin ang aming pananampalataya sa buong mundo. Hinihiling namin ito sa pamamagitan ni Kristo na aming Panginoon.
Amen.
