27,322 total reads
Ginawaran ng pagkilala ng lokal na pamahalaan ng Davao del Norte ang Caritas Philippines – Diocese of Tagum sa pamamagitan ng Diocesan Social Action Ministry nito para sa aktibong pakikibahagi sa pagtugon sa oras ng kalamidad sa lalawigan.
Sa naganap na Provincial Culmination and Recognition Activity ng Provincial Government of Davao del Norte para sa National Disaster Resilience Month (NDRM) 2025 noong ika-30 ng Hulyo, 2025 ay kinilala ng lokal na pamahalaan ang social action ministry ng Diyosesis ng Tagum bilang isang aktibong kasapi ng Provincial Disaster Risk Reduction and Management Council (PDRRMC) sa lalawigan.
“Caritas Philippines – Diocese of Tagum, through the Diocesan Social Action Ministry, is deeply honored to receive a Plaque of Recognition as a member of the Provincial Disaster Risk Reduction and Management Council (PDRRMC) during the Provincial Culmination and Recognition Activity of the National Disaster Resilience Month (NDRM) 2025.” Bahagi ng pahayag ng Diocesan Social Action Ministry ng Diyosesis ng Tagum.
Ayon sa social action ministry ng Diocese of Tagum, ang naturang pagkilala ay isang hamon sa patuloy na pagsasakatuparan sa misyong itaguyod ang katatagan, kahandaan, at kaligtasan ng pamayanan katuwang ang Simbahan sa oras ng kalamidad at pangangailangan.
Naniniwala rin ang social action ministry ng diyosesis na ang naturang pagkilala ay isang patunay sa kahalagahan ng pagkakaisa ng lokal na pamahalaan, Simbahan, pamayanan at iba pang institusyon ng pamahalaan na nangangasiwa sa kaligtasan ng bawat mamamayan sa oras ng sakuna at iba pang kalamidad sa bansa.
“This recognition affirms our commitment to promoting resilience, preparedness, and compassionate service in times of disaster and need. It also celebrates the solidarity among LGUs, agencies, volunteers, and faith-based institutions in building a safer and more disaster-ready province.” Ayon pa sa social action ministry ng Diyosesis ng Tagum.
Kaugnay nga nito, bahagi ng pinalawig na programang Alay Kapwa ng social action arm ng Catholic Bishops’ Conference of the Philippines (CBCP) ang ‘Alay Kapwa para sa Katugunan sa Kalamidad’ kung saan higit na pinaigting ng Caritas Philippines ang pakikipag-ugnayan sa mga social action arm ng iba’t ibang diyosesis upang maihanda sa kagyat na pagtugon sa sitwasyon ng nasasakupan nitong pamayanan sa oras ng kalamidad at sakuna.
