31,096 total views
Nagpaabot ng pakikiisa ang European Union sa mga apektado ng 7.4 at 6.8 magnitude na lindol na magkasunod na tumama sa Manay, Davao Oriental.
Patuloy na mino-monitor at ina-assess ng European Union ang sitwasyon para sa ibibigay na tulong sa mga residente at komunidad na apektado sa sinasabi ng PHILVOCS na “doublet earthquake”.
Naunang naglabas ang EU ng 750,000 EURO na katumbas ng 50-milyong pisong humanitarian aid sa mga apekatdo ng lindol na tumama naman sa Cebu.
Ang naturang tulong ay ginamit sa emergency relief tulad ng pansamantalang tirahan, tubig at sanitation sa mga lubhang naapektuhan ng lindol at mga nawalan ng tirahan.
Sa kabuuang humanitarian aid, 250,000 EURO ay suporta sa Philippine Red Cross sa pagkakaloob ng cash assistance, tent at household items sa mga residenteng nawalan ng tirahan gayundin sa pangangalaga ng kalusugan ng mga nalindol.
Ang pondo ay bahagi ng kabuuang kontribusyon ng EU sa Disaster Response Emergency Fund ng International Federation of Red Cross and Red Crescent Societies (IFRC).
Ang bagong pondo ay karagdagan sa 7.3-milyong EURO na inilaan na ngayong taon sa humanitarian aid at disaster preparedness sa Pilipinas. Kabilang na dito ang 1.3-milyong EURO na inilaan sa pagtugon sa epekto ng tropical cyclones na tumama sa Pilipinas noong nakaraang buwan ng Hulyo at Setyembre 2025.
