9,834 total views
Inihayag ni Pasig Bishop Mylo Hubert Vergara na nananatiling buhay ang pag-asa sa gitna ng mga krisis at kaguluhang nangyayari sa mundo.
Ito ang binigyang-diin ng obispo sa kanyang homiliya sa pagdiriwang ng Easter Vigil sa Pasig Cathedral.
Sa kanyang homiliya, iniuugnay ni Bishop Vergara ang mensahe ng muling pagkabuhay ni Hesus sa kasalukuyang sitwasyon ng mundo, partikular sa digmaan sa Middle East.
“Anuman ang mangyari, may awa ang Diyos. Anuman ang dinadaanan nating krisis sa buhay, may pag-asa… Sa Iran, sa Israel… may mga libingang may laman… hindi lang daan-daan kundi libu-libu ang pumanaw,” ayon kay Bishop Vergara.
Lubhang ikinalungkot ng obispo ang mga karahasan at nagpahayag ng dalamhati sa patuloy na digmaan at pagkasawi ng maraming buhay.
Gayunpaman, iginiit ni Bishop Vergara na ang muling pagkabuhay ni Kristo ang pinagmumulan ng pag-asa ng sangkatauhan.
Ipinaalala ng obispo na ang liwanag ng Pasko ng Pagkabuhay ay sumasagisag sa tagumpay laban sa kadiliman.
“Naniniwala tayo… na matatapos din ang lahat ng ’yan. Naniniwala tayo na maghahari ang kapayapaan. Kahit sa kadiliman, matingkad ang liwanag… nagtagumpay si Jesus,” ayon sa obispo.
Binigyang-diin ni Bishop Vergara na sa muling pagkabuhay ni Hesus, nagkakaroon ng katiyakan ang mga mananampalataya na malalampasan ang anumang pagsubok.
“Dahil si Jesus ay muling nabuhay, anumang pagdurusa ay malalampasan natin,” saad ng obispo.
Hinimok din nito ang mga mananampalataya na isabuhay ang pananampalataya sa pamamagitan ng pagbabahagi at paglilingkod sa kapwa.
Inihayag ng pastol na ang maliit na liwanag na tangan ng bawat isa ay paalala ng patuloy na pag-asa kay Kristo.
