8,790 total reads
Nagpahayag si Malolos Bishop Dennis Villarojo ng mensahe ng pag-asa at paghilom sa gitna ng mga makabagong sugat ng mundo sa kasalukuyang panahon
Ito ang bahagi ng mensahe ng Obispo kaugnay sa Dakilang Kapistahan ng Pasko ng Muling Pagkabuhay ng ating Panginoong Hesukristo.
Ayon kay Bishop Villarojo, ginugunita ngayon ang Pasko ng Muling Pagkabuhay ng Panginoon sa panahong nababalot ng takot at pangamba ang lahat dulot ng digmaan at kawalan ng katiyakan para sa hinaharap.
“Ipinagdiriwang natin ang Muling Pagkabuhay ng Panginoon sa anino ng isang mundong sugatan dahil sa digmaan. Nakapagdudulot na ng pangamba ang digmaang ito hindi lamang sa mga mismong nakararanas ng kaguluhan kung hindi sa buong daigdig dahil sa kawalan ng kasiguraduhan sa ating kinabukasan. Ito ang makabagong sugat na tangan natin sa ating mga buhay: pighati, takot at pangamba.” Bahagi ng pahayag ni Bishop Villarojo.
Binigyang-diin ni Bishop Villarojo na sa kabila ng mga nagaganap na kaguluhan sa mundo ay nananatiling matatag ang pag-asa ng Simbahan para sa pagkaakaroon ng kaayusan at kapayapaan sapagkat muling nabuhay si Kristo.
Ipinaalala rin ng Obispo na bagamat muling nabuhay si Kristo, nananatili ang bakas ng Kanyang mga sugat na ngayon ay nagiging daan ng paghilom para sa sangkatauhan.
Paliwanag ni Bishop Villarojo, nasasaad sa Mabuting Balita ng Panginoon na ang pagdurusa, pagkamatay at muling pagkabuhay ni Kristo ang naging bukal ng biyaya para sa sanlibutan.
“Hindi naglaho ang kanyang mga sugat, ngunit ito ay nagkaroon na ng bagong kabuluhan sa kanyang muling pagkabuhay. Ang kanyang mga sugat ang pinagmumulan ng paghilom ng buong sangkatauhan… Ang mga sugat na tanda ng kanyang pagdurusa ang siya ring pinagbubukalan ngayon ng biyaya ng paghilom. Itong mga sugat sa katawan na kakampi ng kamatayan ang siya ngayong tanda ng simula ng bagong buhay.” Dagdag pa ni Bishop Villarojo.
Sa gitna naman ng pagdurusa ng mundo dahil sa digmaan, pinaalalahanan ng Obispo ang mga mananampalataya na hindi kailanman iniiwan ng Panginoon ang mga naghihirap.
Hinikayat din ni Bishop Villarojo ang lahat na maging instrumento ng kapayapaan sa pamamagitan ng pagmamahal at pagmamalasakit sa kapwa.
“Sa mundong lubhang pinagdurusa ng digmaan, pinalalakas tayo ng katotohanang ito. Hindi tayo iniiwan ni Hesus sa ating mga pagdurusa. Sinagupa rin ni Hesus ang sukdulan ng karahasan ng tao sa kanyang pagpapakasakit, ngunit hindi niya ito ginawa upang palaganapin pa ang karahasan kundi upang iligtas at hilumin tayo mula sa abang kalagayan ng ating pagkatao.” Ayon pa kay Bishop Villarojo.
Samantala muli ring tiniyak ni Bishop Villarojo na nananatiling buhay ang pag-asa sa kabila ng sugatang mundo, sapagkat si Kristong Muling Nabuhay ang patuloy na pinagmumulan ng paghilom at kapayapaan.
