375 total views
Pinuri ng Greenpeace Philippines ang pagpasa ng Sangguniang Bayan ng Morong, Bataan sa isang ordinansang nagdedeklara sa bayan bilang non-nuclear zone.
Sa ipinasang ordinansa noong Hunyo 22, ipinagbabawal sa Morong ang paglikha ng nuclear energy, muling pagbubukas ng nuclear facilities, at pag-iimbak ng nuclear waste sa loob ng bayan.
Ayon sa Greenpeace Philippines, ipinakikita ng ordinansa ang matibay na paninindigan ng lokal na pamahalaan na pangalagaan ang kaligtasan ng mamamayan at ng kapaligiran sa gitna ng pagsusulong ng pambansang pamahalaan sa paggamit ng nuclear energy.
“The passage of the ordinance shows Morong’s strong commitment to protecting people and the environment,” ayon sa Greenpeace Philippines.
Matatagpuan sa Morong ang Bataan Nuclear Power Plant (BNPP), na matagal nang naging sentro ng pagtutol ng iba’t ibang sektor dahil sa mga pangamba sa kaligtasan at epekto nito sa kapaligiran.
Ilang araw bago ang maipasa ang ordinansa, nagtipon sa Bataan ang mga anti-nuclear organization mula sa Pilipinas at iba pang bahagi ng Asia-Pacific Region para sa No Nukes Asia Forum.
Ginunita rin sa pagtitipon ang ika-41 anibersaryo ng makasaysayang Welgang Bayan noong 1985 na dinaluhan ng mahigit 33,000 mamamayang nagkaisa upang tutulan ang BNPP.
Nanawagan naman ang Greenpeace Philippines sa mga lider ng bansa na higit na pagtuunan ng pansin ang ligtas, malinis, at napapanatiling enerhiya bilang tugon sa krisis sa klima at lumalaking pangangailangan sa enerhiya.
“In this time of a climate crisis, our leaders must prioritize the safety of our communities by advancing clean, safe, and renewable energy sources like wind and solar,” ayon sa grupo.
Patuloy ding isinusulong ng Simbahang Katolika sa Pilipinas ang paggamit ng renewable energy habang tinututulan ang pagsusulong ng nuclear energy at iba pang pinagkukunan ng enerhiyang marumi at mapanganib sa kalikasan at kalusugan ng tao.
