297 total views
Nanawagan si Caritas Philippines President, San Carlos Bishop Gerardo Alminaza sa pamahalaan at mga kinauukulang ahensya na tiyaking mapangangalagaan ang mga watershed ng Negros bago aprubahan ang panukalang P1.2-bilyong Negros Occidental Bulk Water Supply Project.
Ayon kay Bishop Alminaza, ang tubig ay kaloob ng Diyos na nagbibigay-buhay sa tao, mga pamayanan at buong sangnilikha, kaya’t ang pangangalaga sa pinagmumulan nito ay hindi lamang usaping pangkapaligiran kundi isang moral na pananagutan para sa kasalukuyan at susunod na salinlahi.
“The ongoing discussion on the proposed Negros Occidental Bulk Water Supply Project presents us with a larger question: How do we safeguard the watersheds that sustain life across Negros Island while ensuring that development truly serves the common good?,” pahayag ni Bishop Alminaza.
Binigyang-pansin ng obispo ang position paper na inihain ng Green Alert Network Inc., St. Joseph the Worker Parish sa E.B. Magalona at mga kalahok sa Panuba-suba Educational Journey, na nananawagang ipagpaliban muna ang pag-apruba sa P1.2-bilyong proyekto hanggang matugunan ang mga usapin sa pangangalaga sa mga watershed, kalikasan at kapakanan ng mga pamayanan.
Nakasaad sa position paper ang panawagang magsagawa ng masusing pag-aaral sa kalagayan ng Northern Negros Natural Park at Mt. Kanlaon Natural Park, kabilang ang posibleng epekto ng proyekto sa mga underground aquifer at saltwater intrusion, gayundin ang pagpapalawak ng konsultasyon sa mga komunidad na maaapektuhan.
Iginiit ni Bishop Alminaza na sinusuportahan ng Simbahan ang kaunlarang tunay na nagsisilbi sa kabutihang panlahat, ngunit dapat itong igalang ang tao at ang sangnilikha.
“Water cannot be treated merely as a commodity to be extracted. It is a shared gift entrusted to us by God and must be managed responsibly, equitably, and sustainably,” ayon kay Bishop Alminaza.
Hinimok din ng pangulo ng Caritas Philippines ang mga ahensya ng pamahalaan, mga lokal na pamahalaan, eksperto at iba pang sektor na magsagawa ng isang bukas, tapat at makabuluhang diyalogo upang matiyak na ang anumang proyektong pangkaunlaran ay tunay na nagsusulong ng kabutihang panlahat nang hindi isinasakripisyo ang kalikasan at kapakanan ng mga komunidad.
“The future of Negros will not be secured by the volume of water we extract, but by how faithfully we protect the forests, rivers, and communities that make water possible. Caring for our watersheds is caring for our common home and for generations yet to come,” saad ni Bishop Alminaza.
