10,694 total reads
Nanawagan si Divine Word Missionary Fr. Flavie Villanueva sa publiko na suportahan ang nakatakdang impeachment trial ni Vice President Sara Duterte sa Lunes, na aniya’y mahalagang pagkakataon upang manaig ang katotohanan at katarungan.
Ayon sa pari, ang impeachment process ay dapat maging daan upang mailantad ang buong katotohanan para sa kapakanan ng sambayanan, at hindi para sa interes ng iilang panig.
“Mas mahalaga ang usaping impeachment na magaganap sa Lunes. Suportahan natin ito sapagkat ang impeachment na ito ang siyang magpapahayag ng katotohanan at yung katotohanan na sana hindi lang isa ang magwagi. Lahat tayo at katarungan, katotohanan ang magwagi,” ayon sa pahayag ni Fr. Villanueva sa panayam ng Radyo Veritas.
Kasabay nito, pinabulaanan ni Fr. Villanueva ang kumakalat na mga alegasyon na may iniwang maleta umano sa kanya sa isang lugar sa Mindanao Avenue.
Iginiit niyang wala siyang kaalaman sa naturang paratang at hindi pa niya napupuntahan ang lugar na tinutukoy.
Binigyang-diin din ng pari na hindi siya magpapadala sa mga maling impormasyon at sistematikong pagpapakalat ng fake news, at sa halip ay mananatiling nakatuon sa mga usaping may tunay na kabuluhan para sa bansa.
Dagdag pa ni Fr. Villanueva, “Anyway, we do not and I will always refuse to give oxygen to misinformation and to systematic attacks that leads to fake news.”
Umaasa si Fr. Villanueva na sa pagdinig ng impeachment case ay mananaig ang katotohanan, katarungan, at pananagutan.
Si Fr. Villanueva ay kilalang kritiko ng anti-drug war policy na ipinatupad ni dating Pangulong Rodrigo Duterte na nagdulot ng libo-libong biktima ng extra-judicial killings.
Siya rin ang Founder at Executive Director ng Arnold Jannsen Kalinga Foundation, isang organisasyong tumutulong sa mga pamilyang naapektuhan ng kampanya kontra droga, kabilang ang mga naulilang pamilya ng mga napaslang.
Bahagi din ang pari sa nagsampa ng impeachment complaint laban kay Vice Presidente Sara Duterte noon 2025 at 2026, na inaasahang magsisimula ang paglilitis sa July 6.
