6,322 total reads
Kinondena ng Alyansa Tigil Mina (ATM) ang naging kautusan ng National Commission on Indigenous Peoples (NCIP) na buwagin ang anti-mining barricade ng mga katutubong pamayanan sa Barangay Ipilan, Brooke’s Point, Palawan.
Ayon kay ATM National Coordinator Jaybee Garganera, nilalabag ng naturang hakbang ang karapatan ng mga residente at mga katutubo sa mapayapang pagtitipon at malayang pagpapahayag, pati na ang karapatang ipagtanggol ang kanilang lupaing ninuno laban sa mapaminsalang pagmimina.
“It prevents the community from collectively protecting their ancestral domain and cultural heritage from destructive mining operations,” pahayag ni Garganera.
Iginiit din ni Garganera na sa halip na ipabuwag ang barikada, dapat sanang siniyasat ng NCIP ang mga hinaing ng mga katutubong pamayanang matagal nang naninirahan at nangangalaga sa kabundukan ng Barangay Ipilan, na nagsasabing hindi sila naisama sa mga naging proseso ng pagpapasya ng komisyon.
Samantala, nagpahayag din ng suporta ang ATM sa panawagan ni Brooke’s Point Vice Mayor Mary Jean Feliciano na imbestigahan ang naging desisyon ng NCIP at alamin kung nasunod ang mga itinakdang legal na proseso, makabuluhang konsultasyon, at mga probisyon ng Indigenous Peoples’ Rights Act (IPRA).
“The NCIP must be investigated and held accountable. Its mandate is to protect the IPs, not facilitate mining operations that endanger the lives, ancestral lands, and culture of indigenous groups,” giit ni Garganera.
Nauna nang sinabi ni Feliciano na itinatag ang NCIP upang pangalagaan ang karapatan at kapakanan ng mga Katutubong Pamayanan, at hindi upang isantabi ang tinig ng mismong mga komunidad na inaatasan nitong paglingkuran.
Binigyang-diin ng bise alkalde na mahalagang matiyak na ang lahat ng desisyong may kinalaman sa mga lupaing ninuno ay sumusunod sa due process at tunay na nagbibigay-halaga sa pakikilahok ng mga apektadong katutubo.
“When decisions affecting ancestral domains are perceived to disregard the voices of those who have long protected these lands, public trust in the institution is inevitably placed at risk,” ayon kay Feliciano.
Binibigyang-diin sa Laudato Si’ ang kahalagahan ng pangangalaga sa kalikasan at paggalang sa karapatan ng mga katutubong pamayanan bilang mga tagapangalaga ng kanilang mga lupaing ninuno.
