16,066 total reads
Puspusan ang pagpapalakas ng Dapat Isa Lang Movement – Zamboanga City Chapter sa kampanya nito para sa people’s initiative na naglalayong maipasa ang isang tunay na Anti-Political Dynasty Law sa pamamagitan ng pagsasanay sa mga kabataang lider na mangunguna sa pangangalap ng mga lagda sa kanilang mga komunidad.
Dinaluhan ang pagsasanay ng mga youth leaders at peace advocates mula sa iba’t ibang housing communities na katuwang ng ZABIDA upang higit nilang maunawaan ang layunin ng Dapat Isa Lang Movement at ang kahalagahan ng pagpapatibay ng isang tunay na Anti-Political Dynasty Law.
Tinalakay rin sa pagsasanay ang bersyon ng panukalang batas na isinusulong sa pamamagitan ng people’s initiative, gayundin ang tamang proseso ng pangangalap ng mga lagda upang maging handa ang mga boluntaryo sa pagpapalawak ng kampanya sa kani-kanilang mga lugar.
“Throughout the session, participants were oriented on what the Dapat Isa Lang Movement stands for and why a genuine Anti-Political Dynasty Law matters for the future of our communities. The volunteers also learned about the People’s Initiative version of the bill, the very law that ordinary citizens themselves are bringing forward, and were walked through the signature collection process so they can carry it out with confidence and care.” Bahagi ng pahayag ng D1L Movement.
Ayon sa Dapat Isa Lang Movement, mahalagang papel ang gagampanan ng mga kabataan sa pagpapalawak ng adbokasiya dahil sila ang magsisilbing tagapagpaliwanag at mangunguna sa paghikayat sa mas marami pang mamamayan na lumagda sa petisyon.
Nagpasalamat naman ang kilusan sa ZABIDA at sa mga opisyal ng Campo Vida Agricultural Learning Center sa kanilang suporta at pagbubukas ng kanilang pasilidad para sa matagumpay na pagsasagawa ng pagsasanay.
“With every new volunteer trained, the reach of this movement grows. These youth leaders now return to their communities not only as participants but as advocates ready to guide others through the process of lending their signatures to this cause.” Dagdag pa ng D1L Movement.
Binigyang-diin ng Dapat Isa Lang Movement na ang pagtatapos ng pamamayani ng political dynasties ay maisusulong sa pamamagitan ng sama-samang pagkilos ng mga mamamayan.
Isinagawa noong Hunyo 28, 2026 ang Training of Trainers (TOT) sa Campo Vida Agricultural Learning Center sa Barangay Malagutay, Zamboanga City, sa pangunguna ng Zamboanga-Basilan Integrated Development Alliance, Inc. (ZABIDA).
