1,067 total reads
Inaanyayahan ni Papal Nuncio to the Philippines Archbishop Charles Brown ang mga mananampalataya na panoorin ang pelikulang ‘Just Javier’, na naglalahad ng natatanging kuwento ng espirituwal na pagbabago ng isang kabataang Kastila.
Tampok sa pelikula ang buhay ni Javier Sartorius Milans del Bosch, mula sa kilalang angkan sa Spain na naging matagumpay sa larangan ng sports at negosyo.
Sa ginanap na movie screening sa Greenbelt My Cinema sa Makati City nitong August 12, kung saan isa si Archbishop Brown sa mga dumalo, sinabi nitong malaki ang maitutulong ng kuwento ni Javier upang mapalalim ang pananampalataya at pagninilay ng mga manonood.
“I encourage each and every one of you, if possible, to come and see this wonderful movie. You will be spiritually uplifted and edified by the story of his life,” pahayag ni Archbishop Brown sa Radyo Veritas.
Hinangaan ng nuncio ang kuwento ng binata na tinalikuran ang marangyang buhay upang tahakin ang landas ng pananampalataya at paglilingkod.
“It tells the story of a young man from Spain who experienced an amazing spiritual conversion—he is kind of a modern St. Augustine,” ani Archbishop Brown.
Si Javier ay isang mahusay na atleta na naging kampeon sa larangan ng paddle tennis habang nag-aaral ng Business Administration sa Amerika.
Gayunpaman, sa kabila ng mga natatamong tagumpay, pribilehiyo, at magandang kinabukasan ay patuloy nitong hinahanap ang mas malalim na kahulugan ng buhay.
Sa pamamagitan ng kanyang karanasan sa Los Angeles, na pakikipagtagpo at pakikisalamuha sa mga dukha at palaboy sa lugar ay mas umigting ang kanyang pagnanais na maghanap nang malalim sa Diyos sa pamamagitan ng pagninilay at pagsusuri ng sarili.
Sa kanyang paghahanap sa kahulugan ng buhay ay dinala si Javier sa Cusco, Peru, kung saan naranasan niya ang buhay-misyonero sa paglilingkod sa mga batang inabandona at natuklasan ang halaga ng panalangin, paglilingkod sa kapwa, pamumuhay nang payak, at ganap na pagtitiwala sa Diyos.
Higit sa isang dokumentaryo o karaniwang biographical film, inilalahad ng Just Javier ang mga tanong tungkol sa tunay na layunin ng buhay, kaligayahan, sakripisyo at tapang na sundin ang bokasyong ipinagkakaloob ng Diyos.
Ang pelikula ay mula sa Bosco Films na nakabase sa Spain na kilala sa pagpapalabas ng mga pelikulang nagbibigay-inspirasyon at nakatuon sa mga pagpapahalaga para sa mga manonood sa pamamatnubay ng director na si Josepmaria Anglès at ginawa sa produksyon ng Adauge.
Mapapanood ang ‘Just Javier’ sa mga piling Ayala Malls Cinema sa bansa mula August 12 hanggang 18.
Narito ang talaan ng mga sinehan:
MAKATI CITY
– Greenbelt
– Glorietta
– Circuit
PASIG CITY
– Feliz
QUEZÓN CITY
– Trinoma
– U.P. Town Center (UPTC)
PARANAQUE CITY
– Manila Bay
TAGUIG
– Bonifacio High Street
CEBU
– Central Bloc
CAYAGÁN DE ORO
– Centrio
BACOLOD
– Capitol Central
TEASER:
