19,639 total reads
Nanawagan si Pope Leo XIV sa Simbahan na maging bukas sa lahat at itakwil ang anumang uri ng diskriminasyon at mga hadlang na yumuyurak sa dignidad ng tao, kasabay ng panawagan para sa kapayapaan sa gitna ng nagpapatuloy na karahasan.
Sa kanyang Angelus sa Castel Gandolfo nitong Linggo, August 16, binigyang-diin ng Santo Papa ang aral mula sa Ebanghelyo tungkol sa babaeng Cananea na patuloy na lumapit kay Hesus upang humingi ng kagalingan para sa kanyang anak.
Ayon kay Pope Leo XIV, ipinakita ng babae ang kababaang-loob at determinasyon sa kabila ng mga hadlang na kanyang kinaharap.
“From the Canaanite woman, we learn humility and determination. Thanks to her faith, we learn that God’s table is set for everyone and that no one is left merely with crumbs, because each person has his or her own place with the Father,” ayon kay Pope Leo XIV.
Binigyang-diin ng Santo Papa na ipinakikita ng pananampalataya ng babaeng Cananea na ang hapag ng Diyos ay walang itinatangi at bukas para sa lahat.
Sinabi ng Santo Papa na hindi dapat tanggapin ng mga Kristiyano ang umiiral na kulturang hindi gumagalang sa dignidad ng tao.
“In the light of this faith, inequalities, discrimination, and barriers that trample on the dignity of too many of God’s sons and daughters become unbearable,” dagdag ng Santo Papa.
Iniugnay din ng punong pastol ang salaysay tungkol sa Cananea sa misyon ng Simbahan na makinig sa mga hindi inaasahang paraan ng pagkilos ng Diyos.
Ipinaliwanag ni Pope Leo na patuloy na kumikilos ang Diyos sa kanyang paraan upang maipalaganap ang tunay na kapayapaan sa pamayanan.
“Even today, the Church can be surprised by God’s work and spread the peace of Christ beyond boundaries already drawn,” aniya.
Ayon sa Santo Papa, nauuna na ang biyaya ng Diyos sa misyon ng Simbahan at kumikilos ito sa bawat isa at hinimok ang mananampalataya na manatiling bukas sa pakikinig sa tawag ng Diyos sa paglilingkod.
“In every encounter — even those that disrupt our plans — we are to listen attentively by opening our eyes and hearts to what God wants to tell us,” saad pa ni Pope Leo.
Sa kanyang mensahe matapos ang Angelus, muling nanawagan si Pope Leo XIV para sa agarang pagtigil ng karahasan laban sa mga sibilyang Palestinian sa West Bank.
“I renew my appeal for an end to the ongoing violence against the Palestinian civilian population in the West Bank,” panawagan ni Pope Leo.
Kasabay nito, hinimok niya ang international community na kumilos upang isulong ang two-state solution bilang daan tungo sa makatarungan at pangmatagalang kapayapaan.
“I urgently call on the international community to work toward advancing the two-state solution, for a just and lasting peace,” aniya.
Binigyang-diin din ng Santo Papa ang mahalagang misyon ng Simbahan sa gitna ng mundong patuloy na naghahanap ng kapayapaan.
