46,390 total reads
Pinaiigting ng Philippine National Police ang kampanya laban sa pagnanakaw ng kuryente at hinikayat ang publiko na agad ireport sa mga awtoridad ang mga insidente ng illegal tapping at jumper upang maiwasan ang mas malalang aksidente at pagkalugi sa mga lehitimong konsyumer.
Sa panayam sa programang Veritas Pilipinas, inihayag ni Manila Police District Spokesperson, PMAJ. Philipp Ines na maaring maharap sa kaso ang mga mahuhuli sa pagnanakaw ng kuryente sa ilalim ng Republic Act No. 7832 o Anti-Pilferage of Electricity and Theft of Electric Transmission Lines/Materials Act.
Binigyang-diin ni Ines na bukod sa pagtaas ng singil sa kuryente, maaari ring mauwi sa sunog at iba pang aksidente ang illegal connections.
“Hindi lamang po ’yung pagbabayad natin—na mga lehitimong nagbabayad at kumokonsumo ng kuryente—kung hindi, nagdudulot po kasi ito ng mga aksidente katulad po ng sunog.” Bahagi ng pahayag ni Ines sa Radyo Veritas.
Ayon sa spokesperson ng MPD, mabigat ang parusa sa pagnanakaw ng kuryente, lalo na kung sangkot ang isang empleyado ng power service provider.
Pagbabahagi ni Ines, maaaring umabot sa 12 taon at isang araw hanggang 20 taon ang pagkakakulong depende sa kasong isinampa at mga umiiral na probisyon ng batas.
Hinimok naman ni Ines ang publiko na huwag balewalain ang mga nakikitang paglabag at gamitin ang 911 upang maiulat ang mga kahina-hinalang illegal electrical connections.
“Hindi po dapat natin kinikibit-balikat ’pag nakikita po natin na may mga lumalabag sa batas. Itawag niyo po sa ating awtoridad. Gamitin niyo po ’yung numerong 911.” Dagdag pa ni Ines.
Binigyang-diin din ng opisyal na ang pagkunsinti sa ganitong gawain ay maaaring maging dahilan upang isipin ng iba na normal lamang ang pagnanakaw ng kuryente.
“’Pag hindi po natin pinapansin, akala nu’ng iba ay nagiging tama na lang at normal na lang. Hindi po siya normal. Unang-una, ang apektado po nito, tayo mismo po na nagbabayad ng kuryente.” Ayon pa ni Ines.
Paliwanag ni Ines, mahalaga ang pakikiisa ng publiko upang maprotektahan ang mga pamilyang regular na nagbabayad ng kanilang konsumo at maiwasan ang panganib na dulot ng illegal connections.
“Tandaan po natin, marami po tayo ang pumapasan nito. Bigyan naman po natin ng hustisya ‘yung mga lehitimong nagbabayad nang tama sa kuryente.” Panawagan ni Ines.
Giit ni Ines, ang pagnanakaw ng kuryente ay hindi lamang usapin ng paglabag sa batas kundi isang panganib sa buong komunidad, lalo na sa mga lugar na siksikan ang mga kabahayan at negosyo.
Sa pananaw ng Simbahan, ang pagiging tapat sa paggamit at pagbabayad ng mga serbisyo ay bahagi rin ng pananagutan at malasakit sa kapwa, sapagkat ang pagnanakaw ng isang serbisyo ay maaaring magdulot ng panganib at dagdag na pasanin sa buong komunidad.
