22,985 total reads
Hinikayat ni Novaliches Bishop Roberto Gaa ang mga mananampalataya na sikaping maunawaan at maipahayag ang katotohanan ng Diyos sa kanilang pang-araw-araw na buhay.
Sa kanyang pagninilay para sa Ika-21 Linggo sa Karaniwang Panahon, binigyang-diin ng Obispo ang ugnayan ni Apostol Pedro sa Diyos Ama na naging batayan ng kanyang pamumuno sa mga apostol na hindi nagmula kay Pedro mismo ang awtoridad, kundi sa kanyang pagkakaugat sa Diyos.
Ipinaliwanag ni Bishop Gaa na bagama’t naging pabigla-bigla at nagkaroon din ng mga pagtatalo si Pedro kasama ang iba pang mga apostol, nanatiling mahalaga ang kanyang koneksyon sa Ama sa pagtupad sa kanyang tungkulin.
“Hindi dahil sa kanyang sariling kapangyarihan, kundi sa kanyang koneksyon sa Ama. Kaya makikita natin dito parang ‘yan din sanang inaasam-asam natin. Hindi dahil nais nating maging makapangyarihan, pero nais nating maipahayag ang katotohanan ng Diyos. Nais nating maging panatag sa katotohanan ng Diyos. Isang malaking hamon po ‘yan, and it could be a lifetime endeavor for all of us,” ayon sa pagninilay ni Bishop Gaa para sa ika-21 linggo ng karaniwang panahon.
Ayon sa Obispo, hamon sa bawat mananampalataya na maging daluyan ng katotohanan ng Diyos, hindi upang magkaroon ng kapangyarihan, kundi upang maipahayag ang Kanyang kalooban.
Hinikayat niya ang mga mananampalataya na huwag mangimi o mapagod sa pagsisikap na maunawaan ang ipinapahayag ng Diyos at maisabuhay ito sa kanilang araw-araw na buhay.
