3,159 total reads
Inaanyayahan ang mga paaralan, parokya at komunidad sa buong Pilipinas na makiisa sa “One Million Children Praying the Rosary” ngayong Oktubre 7, 2026, Kapistahan ng Our Lady of the Holy Rosary.
Ipinagdiriwang ngayong taon ang ika-21 anibersaryo ng pandaigdigang prayer campaign na inilulunsad ng pontifical foundation ng Vatican na Aid to the Church in Need (ACN) upang pag-isahin ang mga bata sa pananalangin ng Santo Rosaryo para sa kapayapaan sa mundo.
Isasagawa ang pangunahing pagdiriwang ngayong taon sa pangunguna ng San Sebastian Cathedral School of Tarlac, Inc. sa Diocese of Tarlac mula alas-8 ng umaga hanggang alas-11:30 ng umaga.
Sa paanyaya nina ACN Philippines National Director Maximillan Ventura at ACN Ecclesiastical Assistant Rev. Fr. Reynaldo V. Romero, hinihikayat ng sangay ng pontifical foundation ng Vatican sa Pilipinas ang mga paaralan at faith communities na tipunin ang mga bata, guro at iba pang miyembro ng komunidad upang sama-samang manalangin, maging sa mga silid-aralan, kapilya o kani-kanilang tahanan.
“This year, we celebrate the 21st anniversary of ‘A Million Children Praying the Rosary,’ a worldwide prayer movement uniting children across the globe in invoking peace through the simple yet powerful prayer of the Rosary.” paanyaya ng ACN-Philippines.
Ayon sa ACN-Philippines, ang kampanya ay hango rin sa pananalita ni Saint Padre Pio na “When a million children pray the Rosary, then the world will change.”
Maaaring makiisa ang mga parokya, paaralan at komunidad sa pamamagitan ng pagpaparehistro, pagtitipon sa pananalangin at pagsubaybay sa live broadcast ng pagdiriwang sa mga opisyal na online pages ng ACN Philippines at Diocese of Tarlac, habang maaari ring sumali sa pamamagitan ng Zoom ang mga komunidad na nais maitampok sa live feed.
Hinihikayat din ang mga kalahok na magbahagi ng larawan o maiikling video ng kanilang pakikilahok upang maging bahagi ng pandaigdigang panalangin.
“May our children, with their pure hearts and childlike faith, truly become little pilgrims of hope, bringing peace and light to our families, our Church, and our world.” Dagdag pa ng ACN-Philippines.
Sa pamamagitan ng Santo Rosaryo, inaanyayahan ang mga bata na maging mga munting saksi ng pananampalataya at mga tagapagdala ng panalangin para sa kapayapaan sa kanilang pamilya, Simbahan at buong mundo.
Ang One Million Children Praying the Rosary ay gaganapin sa Oktubre 7, 2026, mula alas-8 ng umaga hanggang alas-11:30 ng umaga, sa pangunguna ng Diocese of Tarlac.
